admin
UKULIMA yinto eqakathekileyo kakhulu empilweni zabantu ikakhulu labo abahlala emaphandleni lasemapulazini.
Kuqakathekile ngoba olimileyo kathengi impuphu edulayo ezitolo, okwakhe yikungena esiphaleni sakhe adonse amasaka aqonde esigayweni engakhiphanga ngitsho indibilitshi.
Olimileyo kafi ngendlala ungena ensimini yakhe ayezikhethela akuthandayo azidlele umoya wakhe uchelesile ngoba esidla izithukuthuku zakhe.
Ulakho njalo ukuthi uma esevunile azidlele inkobe, umxhanxa, imfushwa aphinde azitshebele langendumba azilime emasimini akhe.
Kuqakathekile ukulima ngoba uma izulu lithe lana kuhle, olimileyo ulakho ukuthi athengise amabele akhe athole imali enhle kakhulu. Ulakho njalo lowo olimileyo ukuthi asebenzise amahlanga uma esevunile ukupha inkomo zakhe ebusika ukuze ziqine zenelise ukuthi zilime njalo ngesikhathi sezulu esilandelayo.
Ababona ngezomumo womkhathi sebeveze ukuthi isigaba sokulima sika-2021/2022 sizabe silezulu elifana lelanyakenye. Lezi zindaba ezimnandi kuye wonke umuntu olendawo yokulima osekusitsho ukuba abantu sokumele baqalise khathesi ukugijima besiya le lale behlanganisa impahla yokulima ukuze izulu lithi litshaya phansi labo begqoka amajambo bengena emasimini betshaya imfolo bafake inhlanyelo phansi.
Okunye okuqakathekileyo yikuthi njengoba uHulumende wasungula indlela yokulima elondolozayo eyeNtwasa kusigaba sokulima sika2020/21 eyiyo eyenze ilizwe laba lesivuno esihle kuhle futhi ukuthi abalimi balandele indlela efanayo njalo kulo umnyaka ukuze bazitshayele inala okwesibili.
Ezinye indaba ezimnandi ngalokhu yikuthi nyakenye abantu bebeqalisa ukulima ngale indlela okutsho ukuba njengoba lonyaka abantu sebelolwazi olungcono ukuthi indlela le isebenza njani kutsho ukuthi lonyaka lesivuno laso sizakhuphuka kulesanyakenye nanku phela abomkhathi sebekhulumile ukuthi izulu likhona lonyaka.
Abanye uthola bekhala ngokuthi abalayo imali yokuthenga inhlanyelo kumbe eyokudinga abantu abazabasebenzela okuyinto emangalisayo ngoba uHulumende uyanika abalimi inhlanyelo kunye lomvundiso ukuze kulinywe okwabo kuphela kuyabe sekuyikudinga izisebenzi nxa kuyikuthi indawo yabo inkulu.
Ngomnyaka ozayo sifuna ukugwaba ngabalimi bonke ukuthi bawusebenzise kuhle umhlabathi sesilokudla okugcwele eziphaleni zabo kunye lezelizwe.
Iqiniso okumele sibelazi yikuba akula enye inotho esingayithola ukwedlula ekulimeni.
Lokhu kuyingoba umhlabathi welizwe lakithi uvundile njalo ukhulisa kuhle izilimo ezitshiyeneyo.
Isifiso sethu-ke ngesokuba abalimi benze wonke amalungiselelo angabe esenziwa ukwenzela ukuthi mhla izulu litshaya phansi sonke sibobotheke kungabi lomuntu ozabamba ikhanda ahlabe umkhosi.
Kungakho-ke silethemba lokuthi abalimi bazasebenza gadalala ukuze kumnyaka ozayo abantu bakholise ihlobo.
Online Reporter