Online Reporter
Sikumbuzo Dabengwa
USukuzukuduma khathesi wayesephupha loba yisiphi isikhathi angajumeka. Emthunzini wayethi angahlala ngaphansi kwesihlahla ephumula izinkomo zichakile ajumeke, aphuphe. Wayekhuluma labaphansi, abadala, amadlozi akwabo. Babemtshela okwakufanele akwenze. Waziswa ngomkhonto wakhe ukuba awukhothe ukuze aphenduke abe yilokhu ayefuna ukuba yikho. Ukuphendukela kusimo wayezakhotha ekucineni komzaca wentonga yakhe.
Wayephenduka abe yisilwane kumbe inyoka mhlawumbe ithonga. Wayethi angadlala ngalokhu abadala bamkhuze bamqondise ukuba angadlali esethusela izifuyo ezazingelacala. Abaphansi bamlaya ukuba ayekwethusa imuli kaSinyoro. Wakwenza lokho uSukuzukuduma evela enkomeni ayehlezi ezelusa nsukuzonke ngendlela enhle.
Ngelinye lamalanga wethusa imuli yakoSinyoro ngokuzintshintsha abe yisilwane. Lelolanga kwakufike abemzini ababengoninazala loyisezala kaSinyoro. USukuzukuduma waphenduka waba yingonyama. Bethuka ,abanye basikwa zingqamu kubalekwa. Waphinda wakhotha intonga yakhe wabuyela esimeni sakhe.
Waphinda njalo uSukuzukuduma waba yinkalakatha yenyoka endlini. Bethuka bonke kanye loPayiva. Inhloso yayiyikwethusa imuli kaSinyoro kuphela kungela kubalimaza. Amadlozi abuye amazisa uSukuzukuduma ukuba kwasekufanele abuze ngemvelaphi yakhe kuMaGumbo. Kwakufanele aqale abethuse ngokuba ngumuntu oyinkalakatha owayezababamba ngapha langapha kodwa angabalimazi. Wakwenza konke lokhu umfana.
Kwabahlupha abakoSinyoro ukubuzwa ngemvelaphi yomfana lo baze bahlosa ukuyacela usizo enkosini ukuba ikhuphe abantu bayo babisele uMsakade kubo. Inkosi yamxotsha sanja uSinyoro, yala ukumsiza ngenkemenkeme yendaba ayezifake kuyo. Bake balwa uSinyoro loMaGumbo ngenxa yokuphikisana ngoSukuzukuduma, balumana ucilikicane.
Balanyulwa nguPayiva. UPayiva watshela uSukuzukuduma ibizo lakhe elalingasaziwa muntu. Bamcela oSinyoro uPayiva ukuba ayebuyisela uSukuzukuduma kubo kodwa walandula ngoba esengohamba kibo. USinyoro lomnkakhe baphinde bacabanga ukuba uSinyoro ambuyisele. Wazama kodwa waphenduka endleleni emva kokuba uSukuzukuduma esemethusile ngokuba yingonyama.
Kulandela lokhu baba lomcabango wokuba bayekuMpanga, inyanga eyayike igile imikhuba ethile. Wavuma ukubasiza uMpanga ngempande eyayizaguquka ibeyinyamazana layo eyisithombe. Bajabula bafa kanti ababuzanga elangeni. USukuzukuduma walaywa ngabadala ukuba laye aguquke atshaye inyamazana kaSinyoro ngempama.
