Online Reporter
NguLangalakhe Mabena
UMDLALI odume ngokuwina imiklomelo, uZenzo Nyathi, usevele wakhanya ngenye indlela kwezokuzilibazisa, eveza ikhono lakhe kwezomculo ku-albhamu entsha ye-The Dab Band elengoma ezingu-20, ethi uMthandazo.
UNyathi, owaziwa kakhulu ngendima yakhe kaMzambane emdlalweni kamabonakude odumileyo weZBCtv, Amakorokoza, uvele kakhulu engomeni ethi Umalayitsha, ebhalwe yaphinda yaqanjwa ngumthwebuli wezithombe owake wawina imiklomelo, uMgcini Nyoni. Uphinde abe yingxenye kwenye ingoma ekule albhamu, ethi Sengibaleka.
Lanxa abantu abanengi eZimbabwe bemazi uNyathi ngomsebenzi wakhe esiteji lakumabonakude, ezomculo bezilokhu ziyingxenye yempilo yakhe. Ukuvela kwakhe ku-uMthandazo kungamangalisa abanye abalandeli, kodwa umdlali lo uthi le phurojekithi imnike ithuba lokuphinda axhumane lothando lomculo aselekhulise okweminyaka eminengi.
Engakazakheli udumo lokuba ngomunye wabalingisi abaziwayo elizweni, uNyathi wayesebenza njengomculi owayesekela umculi ongasekho emhlabeni, uBeater Mangethe. Waphinda waba lilunga leqembu lomculo i-The Mighty Boys, elabunjwa ngesikhathi esebenza e-Amakhosi Theatre. Kuleliqembu kwakulabanye uNyathi, uJulian Tshuma, uWilling Mhlanga loSimon Mhlanga.
Ekhuluma ngolwazi aluthole ekuphekeni lumculo le-The Dab Band, uNyathi uthe ukusebenza laleliqembu kube yinto emnandi njalo emnike umvuzo omkhulu, lanxa isikhathi sokuzilolonga besilutshwana.
“Bekuyinto emangalisayo ukusebenza le-The Dab Band, ikakhulu ngoba besingelaso isikhathi eseneleyo sokuhlangana lokuzilolonga. Bangamukele kuhle njalo bangiphatha njengomunye wabo. Ngalokho ngingathi bangabalingani abahle kakhulu emsebenzini.
“Abantu abanengi abangakwaziyo yikuthi mina bengilokhu ngithanda ezomculo. Ngesinye isikhathi ngangicula ngisekela uBeater Mangethe ongasekho emhlabeni. Ngangiphinde ngibe lilunga leqembu elalibizwa ngokuthi yi-The Mighty Boys. Umculo ubulokhu uyingxenye yami, yikho kube lula ukuthi ngizwane leqembu ku-uMthandazo,” kutsho uNyathi.
Phakathi kwezingoma ezikuli-albhamu, uNyathi ukholelwa ukuthi ethi Umalayitsha yiyo esithole uthando olukhulu kakhulu kubalaleli.
Ingoma le ikhuluma ngempilo yabantu abasuka ezindaweni zabo besiyadinga amathuba angcono ngaphetsheya komfula uLimpopo. Iveza uvalo lokungazi ukuthi kuzaphetha ngani oluhlangana labantu abathatha uhambo oluyingozi, iphinde iveze ithemba lokuthi impilo engcono ilindele bona ngaphetsheya komngcele.
Ngendlela yayo yokuxoxa indaba, ingoma le iveza umfanekiso ocacileyo womhambi ogcwele ukukhathazeka nxa ecabanga ukuwela amanzi agcwele izingwenya, kodwa eqhutshwa liphupho lokuthola impilo engcono.
“Umalayitsha yisikhalo, yisicelo somhambi okhathazekileyo lapho etshelwa ukuthi sekumele bawele uLimpopo ogcwele ingwenya. Kodwa ngaphansi kwalokho kulomcabango wokuthi mhlawumbe ngakwelinye icele kulempilo engcono lamathuba angcono.
“Ngikholwa ukuthi ingoma le itsho okungaphezu kwendaba eyixoxayo kuphela, ngoba ivumela abalaleli ukuthi bayiqonde ngezindlela ezitshiyeneyo. Umqondo wayo uthathwe kulokho okwenzakala kubomalayitsha abanengi abancedisa abantu ukuwela imingcele, abantu abanengi abake bahlangana labo kumbe abakhule bebabona.
“Abantu abambalwa engike ngahlangana labo bathanda ingoma le njalo bazibona kuyo. Ngakho ngingathi yamukelwe kuhle, njalo ngikholwa ukuthi ngokuhamba kwesikhathi abantu abanengi bazayithanda kakhulu yona le-albhamu yonke,” kutsho yena.
KuNyathi, lumsebenzi umnike ithuba lokukhumbuza abantu ukuthi amakhono akhe kwezokuzilibazisa kawapheleli ekulingiseni kuphela. Ngo-uMthandazo, useveze elinye icele lobuciko bakhe, esebenzisa ulwazi lwakhe njengomculi lomdlali ekwenzeni iphurojekithi esivele idonsa amehlo abalaleli.
