Online Reporter
Umdumo Wezinkondlo: Elalotshwa ngu N.S Sigogo labanye
Ophezulu Stinta
Inkondlo: Umuntu Lo eyalotshwa ngu E.M Matshona
Imizwa
Ekufundeni inkondlo ngokujula kwayo kuqubuka imizwa ethile kobalayo.
Ekufundeni kwenkondlo le kuqubuka imizwa yozwelo, indlela umbalisi asebenza ngayo ezinikela ekwenzeni okuhle umhlaba umkhangelela phansi umeyise.
Kulemizwa yokuziqhenya, izifundo ezivela kumbalisi egoqa umfundi njalo esiba yisibonelo esihle sempilo kuqubula imizwa yokuziqhenya ngomuntu oyisibonelo sempilo eyamukelwa ngumphakathi.
Umfundi othola uthando lombalisi, athole njalo ukuqondiswa ngokwesikolo kanye langokwempilo uvukelwa yimizwa yothando.
Umbalisi lo kakhethi ukuthi umfundi ngonganani, ukhuluma laye ngenhlonipho langokuzithoba, lokhu kwenza lomfundi azizwe eqakathekile, uyathandeka umbalisi onje.
Kuyaqubuka imizwa yobuhlungu nxa sibuka umhlaba useyisa njalo ukhangelela phansi umbalisi owenza umsebenzi omkhulu kangaka.
Inkondlo: Ngiyakwesaba wethu eyalotshwa ngu SJD Mhlanga
Okumunyethweyo
Inkondlo le ikhuluma ngamandla othando lendlela uthando olugqilaza ngakhona ababili abathandanayo. Owesifazana ekukhuleni kwakhe wayengazi lutho ngothando, kodwa ekukhuleni kwakhe wazibona eseyisigqili sothando. Laye owesifazana lo kuyamethusa ukuthi owesilisa owayengazi lutho ngokuzingela kodwa wazingela yena waze wamthola.
Owesifazana uyamangala ngokuzimisela kowesilisa lo owazingela waze wajimba. Sinanzelela ukuthi indaba yothando iqalwa ngowesilisa, nguye osukela owesifazana ezihlalele kuthi ke ekucineni kwakho lubahlukumeze lolothando.
“Wawungasimzingeli, ngenxa yami waba nguye,wangizingela waze wangithola ngikwethu”
Ngenxa yothando lolu, umuntu wesifazana wafulathela wadela abakwabo, walandela owesilisa owayengasisihlobo sakhe ngitsho. Yikho lapha esibona khona amandla othando, umuntu efulathela lapho azalwa khona.
“Ngadela abakwethu ngenxa yakho, ngaboph inhliziyo okomthakathi”
Umuntu wesilisa ulamandla amangalisayo lapho esenelisa ukuguqula owesifazana amphambanise ikhanda, abahlakaniphileyo labayiziwula bonke bayathatheka balandele owesilisa sengani ulentebe yokuhuga.
“Ulentebe esanganis’ owesintwna ingqondo.Wenza yonk’ inzalo yesintwana eyisiwula lehlakaniphileyo ikulandele”
Isilisa siyamenza owesifazana afulathele inhlalakahle yangakibo, ayehlala phezu kwamalahle kowesilisa. Nsuku zonke, amelane lamanqindi, ukutshaywa kube yikudla kwakhe kwansuku zonke. Owesifazana uyaqinisela lokhu kutshaywa aze atunye lokutunya kodwa kasuki, uhlala khonapho njengesikhonkwane.
