Online Reporter
Ubungcwethi besizwe bubonakala elimini lwaso. Ulimi, lazo zonke impawu zalololimi ezigoqela izaga lezitsho luyinsika yempilo yalesosizwe. Ukuma kwesizwe, siziqhenya kungenxa yolimi lwaso njalo ukutshabalala kolimi kutsho ukutshabalala kwaleso sizwe.
Siyabe sesitshabalele nje ngoba ulimi yilo oluqukethe indlela abantu abaziphatha ngayo, indlela okufanele abantu bakhulumisane ngayo, bafiselane inhlanhla ngayo, baxwayisane ngayo njalo bakhangelane ngayo.
Yilo njalo ulimi oluqukethe indlela okumele abantu baqomisane ngayo, bathathane ngayo, balane ngayo. Ngakho-ke ulimi kubalulekile ukuthi lungumthombo lapha isizwe esikha khona ulwazi ngemikhuba langamasiko aso. Osekhohliwe ukuthi umkhuba othile wenziwa njani ugijimela elimini. Kodwa uma lungasekho selutshabalele uqonda ngaphi lo oselahleka? Uyaba senkangala?
Ngakho ke uma ulimi selutshabalele kutsho ukuthi lalesosizwe asisekho – sesifile asiseyikuvuka.
Okwenza ukuthi indimi zabanye abantu zitshabalale yikuzeyisa langendlela abelungu abafika ngayo ikakhulu eZimbabwe. Abelungu ikakhulu laba abafika kuqala bethwele ibhayibhili benza kwaba yibuqaba ukukhonza amasiko abantu abansundu kodwa kwaba ligugu ukukhonza uJesu. Njengoba amasiko enamathelane lolimi kutsho ukuthi owakhuluma indimi zabansundu wakhangelelwa
phansi kwathi owayesekhuluma isiNgisi waphakanyiswa.
Kusukela mhlaka 25 kusiya ku 27 Mpandula esigabeni seBeitbridge, eMpande kuzabe kulomkhosi weTshitaudze Heritage Festival endaweni yeTshitaudze Cultural Village. Inhloso yalumbuthano yikuvuselela amasiko esiVenda, Shangani kunye lesiSotho, okuzindimi ezitholakala esigabeni seMatabeleland South.
Sibatshayela ihlombe abeVenda ngokwenza njalo. Sibakhuthaza njalo ukuthi baziqhenye ngezindimi zabo ngokuzikhuluma imihla yonke.
Ukutshabalala kwezindimi kubangelwa yikuzeyisa, ukwesaba ukuhlekwa ngabanye abantu. Lamhlanje sithi asiziqhenyeni ngezindimi zethu. Singabi lenhloni ngokuzikhuluma loba singaphi.
Abantu kabakhululeke bazikhulumele indimi zabo njalo labazali kababone ukuthi ulimi abalufundisa abantwababo kuqala ngolwakibo. Siyayibongela induna uTshitaudze ngokwenza umcimbi lo wokugqugquzela izindimi zakithi ngoba yiyo kuphela indlela ezancedisa ukuthi indimi zakithi zithuthuke.
Kungumbono waleli phenphandaba ukuthi zonke indimi ezinanzelelwa kuleli ngaphansi kwesisekelo sombuso aluba zingenza imizamo efana lale ukuthi kulondolozwe izindimi kunye lamasiko azo kungaphathisa ukuthi kuveze imbali yethu lalapho esivela khona.
