Online Reporter
BAKWETHU, minengi imikhuhlane ehlasela uzulu, eminye yakhona iyelatshwa ngesiNtu kalula nje kukanti eminye iyabe ifuna isibhedlela ukuze yelatshwe.
Ukuya esibhedlela nxa ugula akutsho ukuthi usulahla isiko lakho kumbe umkhuba wesonto yakho ngoba ikhona eminye imikhuhlane eyabe ifuna ukuhlolwa yimitshina eyabe ingekho lapho esikholelwa khona.
Kukanengi sikuzwa ukuthi banengi abafele ezinkonzweni zabo kumbe ezinyangeni ebazithembayo. Besifa kungayisikho ukuthi inyanga zabo azenelisi ukwelapha kodwa kuyikuthi umkhuhlane abayabe bebhekane lawo uyabe ufuna ukwelatshwa esibhedlela.
Singakhangela imvukuzane, banengi kakhulu ebaqedileyo ngoba bengafuni ukuya esibhedlela. Imvukuzane ngumkhuhlane ohlasela abantu noma yisiphi isikhathi.
Ezibhedlela sebawuhlakaniphela umkhuhlane lo ngoba sebelemitshina abantu abahamba kiyo babone ukuthi ngempela sesingenile isibungu semvukuzane. Bengakubona lokhu bayakwelapha masinyane usile.
Okubi ngokwelatshwa imvukuzane esintwini yikuthi imvukuzane ilezigaba zayo ezokuthi esintwini ngeke bazibone, babona ukuthi yimvukuzane umuntu segulela ukufa, ngakho-ke kuhle ukuthi siyehlolwa imvukuzane selatshwe ezibhedlela.
Ukwazi ukuba ukusiphi isigaba sesifo semvukuzane kuyasiza umphefumulo. Ukuya esibhedlela ke kuyancedisa ukuthi umkhuhlane lo ubonakale kusemasinyane, odokotela bazame ngazo zonke izindlela ukuthi bawulwise uphele emzimbeni.
Kudaba olumunyethwe kuphephandaba likazulu kule iviki, lwenina elilamabele akhulayo, kuyadingeka ukuba inina leli lihlanganise isibhedlela kunye lesiNtu ngoba akwaziwa okwanonisa ingulube.
Mhlawumbe uzaphephela kubodokotela besiNtu njengoba omunye wabodokotela laba ethe lokhu kungabe kuyikuloywa kodwa kungenzakala njalo ukuthi lokhu kungabe kubangelwa yikuthi inina leli lingabe lilemvukuzane eyiyo esisenza amabele alo akhule kokuphela.
Kulokunye njalo ukuthi uyathola umuntu egula umkhuhlane wengqondo kungasikho ukuthi umhlasele nje, kuyikuthi uyabe ehlutshwa ngabadala kumbe kumele amthwasiswe.
Umkhuhlane lo, umuntu ngaze ayehlolwa njani esibhedlela ngezake alunge ngaphandle kokuthi ahambe ayebona abesintwini babone ukuthi uhlutshwa yini. Nxa kungabadala, bayamlapha, nxa kumele athwase bayamthwasisa kumbe bamlahlise amadlozi ngendlela eqondileyo engasoze imhluphe.
Kusenjalo ikhona eyinye imikhuhlane engadingi abesintwini efana lengculaza leminye imkhuhlane ethelelwana ngocansi. Imikhuhlane enje uyahamba uyebona odokotela ubachazele indaba yakho hatshi ukuhlala endlini usithi isonto yami ayivumi ukuthi ngiye esibhedlela. Bayakuthandazela uze ufe ulokhe uthe kho endlini, okunye kudinga isibhedlela.
