admin
Khanyile Ndebele
INHLANGANISO yeAgritex iqhuba uhlelo lokufundisa abalimi indlela yokuhlanyela amatamatisi ngesikhathi sezulu ukuze angaboliswa ngamanzi njalo avuthwe kuhle.
UNkosikazi Treggy Mpofu ongumlimisi uthe nxa abalimi behlanyela amatamatisi kufanele ukuthi phakathi komfolo kube yi-30cm kusiya ku-45cm nge-15 cm.
Ukhuthaze abalimi ukuthi bangahlanyeli amatamatisi endaweni eligceke (open-field) ngoba kubangela ukuthi ahlaselwe yimikhuhlane kungakho kumele ahlanyelwe ku-greenhouse.
“Abalimi bangavikela imikhuhlane engahlasela izilimo zabo ngokuquma ingatsha ezifayo kumbe esezibolile kunye lokubophela amatamatisi ezigodweni ukuze ame angalali phansi. Lokhu lakho kuyavikela ukuthi amatamatisi angaboli.
“Ukuvikela izibungu ezingadla isilimo, umlimi kufanele alime izilimo ezitshiyeneyo ezixotsha izibungu kumbe abuze abakhangele ngezokuthengisa imithi ebulala izibungu ezidla isilimo ukuze bamtshele kabanzi ngemithi angayisebenzisa,” kuchasisa uNkszn Mpofu.
“Ukuze bavundise umhlabathi wabo abalimi bangasebenzisa i-Nutrigrow, nutriplex, le Omnia boost nxa amatamatisi eselamaluba.
Ungezelele wathi izulu nxa lingananga umlimi kufanele athelele ilitha eyodwa yamanzi kusilimo sinye ngasinye kumaviki amathathu akuqala besekusithi nxa sekulusaba umlimi athelele i5 litres, nxa sesiphuma amaluba kufanele athelele i-6 litres besekuthi nxa sesizala abantwana athelele i-7 litres.
Uphethe ngokuthi amanzi aqakathekile ngoba nxa singathelelwanga isilimo samatamatisi amaluba angazala abantwana bayawela phansi, lokhu kucina kunciphisa isivuno somlimi.
“Amanzi aqakathekile njalo ngoba ayehlisa izinga lokubanjwa yimikhuhlane,” kuphetha uNkszn Mpofu.
Online Reporter