admin
KUHLE ukuthi nxa abantu bethethene behlezi ndawonye bakhulumisane ukuze nxa kukhona okungasahambi kuhle kulungiswe kungakachitheki igazi ngoba nxa sokuthe kwenzakala lokhu abantwana yibo abezwa ubuhlungu obukhulu.
Kubuhlungu ebantwaneni ukubona abazali bengasezwani ngenxa yokuthi ukhona oyabe esegila imikhuba engalunganga. Kuba yisifundo esibi njalo ebantwaneni ngoba nxa besesebancane bengacina becabanga ukuthi mhlawumbe into enziwa ngabazali babo iqondile.
Kuyonale iviki sifunde kumaphephandaba ngesinye isisebenzi seyunivesithi yeMidlands okubikwa sizibulele ngenxa yokungathembeki emtshadweni.
Akukedluli nyanga ngaki sifunde njalo ngelinye inina okubikwa ukuthi labikela umkalo ukuba umntwana athi ngowakhe kasi wakhe. Lesisenzo senza indoda le yakhetha ukuthatha impilo yayo ngoba ibona kungcono ukufa kulokuhlambazwa ngumkayo kanye lomhlaba.
Ukufa kwendoda le kuyinto ebuhlungu kakhulu lanxa kuhlezi kukhulunywa ukuba umama nguye owazi uyise womntwana. Kodwa-ke kusuka kube linxeba elikhulu kulo othe watshelwa ukuthi umntwana kasiwakhe yena ebehlezi ezitshaya isifuba ethi umntwana ngowakhe njalo esemondle okweminyaka eminengi. Inina leli lizaphila impilo yalo yonke lizisola ngokubangela ukuswelakala komphefumulo ngenxa nje yokwehluleka ukukhulumisana kuhle lomkalo.
Kambe kubuhlungu kanganani lemntwaneni obehlezi esithi lowomuntu nguyise esesizwa kuthiwa kasekho emhlabeni. Khona-ke kuminyaka embalwa ezayo esekhulile kuzakuba buhlungu okunganani esebikelwa ukuthi umuntu ayethi nguyise kasiyise njalo wahle wazibulala ngoba etshelwe lokho.
Njengoba sike satsho ngaphambilini ukuthi kuba kuhle ukukhulumisana nxa abantu behlezi ndawonye, silethemba lokuthi nxa kulohlupho phakathi kwalaba ababili njalo bekhulumisana kwakungasoze kube khona amanyala anje.
Lokhu kwenza njalo impilo yabantwana ingabe isamnandi langekhaya. Kuhle ebazalini ukuthi bacabange abantwababo bengakenzi izinto ezingaphambanisa impilo zabo ngoba phela umthetho uyakwala, umhlaba wonke jikelele ukuthi abantwana bahlukuluzwe emoyeni lasemizimbeni yabo.
Abantwana kumele bakhuliswe endlini elothando njalo lolothando ngeze lwabakhona nxa kungela kuzwana phakathi kwabazali.
Kuyingqobe kubo bonke abazali ukuthi ngazozonke izikhathi nxa besenza izinqumo lanxa kuliwa babone ukuba bayakhulumisana kuphele besenzela abantwababo.
Online Reporter