admin
KULENTO enye kuphela zwi ehlupha abantu bakaMthwakazi; yikungasekeli lokhu okungokwakibo.
Njengesibonelo, banengi abahlabeleli abadabuka emhlubulweni weMatabeleland asebaze babeka phansi amajogwe kumbe baze bakhetha ukuyahlabela phandle kwelizwe ngenxa yokuswela usekelo oluvela ebantwini bakibo.
ULovemore Majaivana wayeluthola na usekelo olufaneleyo ngokutshaya ingoma zakhe ebantwini balapha? UMgcini “Cal_Vin” Nhliziyo yena-ke? Ngingasabali abahlabeleli abenza kuhle sibili lanxa ulalele ingoma zalabo abafana loSandra Ndebele, Jeys Marabini, Khuxman, kanye labafana lamantombazana asakhulayo abaphuma emhlubulweni lo. Angithi inengi nje labahlabeleli licina lisuka kuleli lisiya eGoli lisiyazama inhlanhla ngoba lapha kungekho okuhambayo.
Ngitsho lamaphephandaba adabuka kumhlubulo wakithi lawo izinto ezingezakithi awazinikezi usekelo olupheleleyo. Kubangelwa kuyini lokhu? Lamuhla lingangithola ngilalele ingoma zeNdolwane Super Sounds kumbe ekaSikhosana osanda kungena enkundleni angithi lingihleka usulu lingibone njengomuntu oziyangisayo. Ngingakhuluma ngolimi lwesiNdebele emhlanganweni, lakho lingikhangelela phansi, lichila amakhala lingibona njengokuyimpatha okungafundanga ngoba kini umuntu oveteza isiLungu nguye ofundileyo njalo ongumuntu kuzwa.
Abanye abazali abalabantwana abafundayo, ulimi lwesiNdebele abaluqakathekisi iloba umuntu enguNdebele, Mabhena sengitsho ngesibongo, yikho nje lanxa umntwana epase isiNdebele uyezwa kuthiwa izifundo zesiNdebele azincedi ngalutho. Ngingathwala iphephandaba lesiNdebele kumbe ugwalo lwesiNdebele ngilubala lakho lingikhangelela phansi, lingenze umuntukazana nje ongafundanga.
Kambe sokwayangaphi ukuzigqaja kwezolo kwabantu bakaMthwakazi ngezinto zakibo?
Koze kube nini bakaMthwakazi lisenyanya izinto zakini kodwa ligijimela izinto zabanye abantu? Lithi ngubani ozalithuthukisa abuye aliphakamise nxa lina ngokwenu lisehluleka ukusekela lokhu okudabuka kini. Lazi kuphela ukudedesela abakhokheli ngokuthi langokuthi kokuncindezelwa, lina kuyini mathupha elizincindezelayo.
Kanti nxa likhangelela phansi okungokwenu lithi ngubani ozakusekela ukuze lakho kuthuthuke kufane lalokhu osokulithethe ngodumo?
Indoda yalapha ekhaya ungayizwa isihlala ibuka njalo incoma umkamakhelwane kulokuthi layo ithuthukise inina layo, kuyabe kusitshoni?
Inengi lenu lifana xathu lalesi isiphukuphuku sendoda. Umuntu ngenxa yokuthi usevela hlala eGoli okwenyanga eyodwa zwi, ubuya esengoyenyanya iloba yini eyenzakala khonalapha kibo. Mamo, uyathola esezitshaya isifuba ngokuthi langokuthi kwezinto zeGoli. Kodwa okwakibo mpu! Ukhuthalele kuphela ukusola kanye lokuhleka usulu izinto zakibo kulokuthi aphume lamasu okuthuthukisa khonalokhu akuhlekayo. Ngalokhu zulu akulalutho elingalwakha kodwa lizahlala lisemuva njengemisila ngoba alilamoya wokuthuthukisa okungokwenu.
Ukuhleka kanye lokudela izinto zakini akulungisi lutho.
Alihawukeli kambe izizukulwane zamazwe afana leSouth Africa kumbe iBotswana, ezizigqaja kuqala ngezinto zakibo bengakahahabeli lokhu okwamanye amazwe.
Ngalokhu kungumbono kaMthunywa ukuthi ukuze lathi sihawukelwe ngezinye izizwe, asiqaleni sizigqaje ngokwakithi. Ngaphandle kwalokhu sizahlala sibubula, sikhalela into engekho njalo sikhomba abanye ngeminwe kodwa amaphutha ekithi.
Online Reporter