admin
ABANTU abaNsundu balenkolo ezinengi ezibasizayo kakhulu empilweni yabo yansuku zonke. Phakathi kwalezinkolo, kulokholo lokuqiniswa komuzi. Lelisiko belisenzelwa ukuthi abantu bakulowomuzi bavikeleke ezitheni noma kweminye imimoya engaqondanga.
Ngokuhamba kwesikhathi isiko leli selisiya lincipha ukulandelwa kwalo ngoba inengi labantu seliguqukele kukholo lwesiKhristu ngakho selikholwa ukuthi imizi yalo igcinwe nguNkulunkulu.
Kuviki edluleyo, kwenzakale isiga kwenye indlu eLobengula koBulawayo lapho okutholakale khona inyoka ezesabekayo kusiga esicatshangelwa ukuthi singabe singesobuthakathi.
Iphephandaba leli ngeviki edluleyo belimumuthe udaba lwenina elibanjwe libhunyumunyu emzini wesinye isakhamuzi koSigola.
Kundaba zombili lezi, kuvele ukuthi imizi le okwenzakale khona izigigaba lezi yimizi eqinisiweyo ngakho abathakathi nxa bezama ukuzaganga kuyo bavele bakhulelwe yizikhonkwane zakuleyo mizi okubangela ukuthi bacine bebanjiwe kumbe imizamo yabo ibhuluke.
Umbuzo obuzwa ngabanengi yikuthi kusasebenza na ukuqinisa umuzi. Wona umuzi uvele uqiniswa njani?
Njengoba umhlaba uguquguquka, amasiko lawo aseguqukile ngakho indlela zokuqinisa imizi sezinengi kakhulu ngakho ziya ngemihlobo yabantu.
Kudala kwakuthiwa umuzi olungiswe kuhle sibili umthakathi uvele kaqumi kulowo muzi ngoba uthi nxa efika kuwo abone kukhazimula umuzi wonke aphandlwe ehluleke lokuthi aqhubekele phambili abesephenduka ayedanela kuleyomizi engaqinanga.
Lezinsuku lakho bakhona osiyazi abamemezela ukuthi bona bayenelisa ukuqinisa imizi. Uvele uqiniswa ngani umuzi, nxa ungaqinisanga kubanjani njalo khona ukuqinisa umuzi kusasebenza na ngalezinsuku?
Inkinga esuka ibhekane lezakhamizi ezinengi yikuthi khonapho ngesikhathi besithi baqinisa imizi yabo bacina bebamba lokunye okungafanelanga. Umuntu acine ebethelelwe isikhonkwane esizacina simhlupha kukanti yena ubesithi uzama ukuzivikela ezitheni. Ezinye izinto ezifakwa ngabantu emagumeni abantu zicina zibaphendukela ziba qedele, imfuyo noma abantwana.
Bakhona njalo abacatsha ngamabizo amabandla bazenze abantu benkosi abazama ukusiza abanye ukuthi bavikeleke kanti bona bagebhela izinto zabo emagumeni abantu basebezikhupha benze sengathi babambe umthakathi khona kuyinto yokwenziwa sabhayisikopo.
Ngenxa yokwanda kwenkolo kusuke kube ngumbuzo njalo ukuthi pho indlela yokuqinisa umuzi esasebenza yiphi. Yisintu kumbe yisiKhristu?
Kungumbono woMthunywa ukuthi ngaso sonke isikhathi izakhamizi zinanzelele abantu ukuthi ababacelayo ukuthi babalungisele imizi yabo baqotho ngoba lezinsuku sekugcwele inyanga kanye labaphurofethi bamanga abacina besipha abantu izinto eziyingozi ezingabalimaza zilimaze sibi sabanye abangazi lutho.
Online Reporter