Online Reporter
Danisa Masuku
KULENDODA yeTsholotsho etshise umkayo waze wafa kulandela ukumsola ngokuthandana lenye indoda.
U-Ephraim Moyo oweMswigana eTsholotsho uvele ngoLwesine phambi kukamantshi weTsholotsho uMnumzana Godfrey Muzungu esetheswa amacala okubulala lokuzama ukubulala.
UMoyo kazange acelwe ukuthi aphendule emacaleni la njalo ugcinwe ejele kuze kufike umhlaka 8 Mfumfu ukuze abuye avele emthethwandaba.
Utshelwe ukuthi ulelungelo lokudinga ingqwetha lokufaka isicelo sebheyili emthethwandaba omkhulu koBulawayo.
Inkundla izwe ukuthi uMoyo wazonda wagana unwabu ngemva kokubona imilayezo yeWhatsApp efonini yomkakhe, wamsola ngokuba lobudlelwano ngaphandle komtshado wabo.
Umtshutshisi uNkosikazi Nobuhle Mguni utshele inkundla ukuthi mhlaka 15 Nkwenkwezi lonyaka, uMoyo wafunga wagomela ukuthi uzabulala umkakhe u-Anita Ndlovu (32) ngoba esathandana lenye indoda.
Kubikwa waqala ngokutshaya umkakhe ekhanda, wabuye wathatha imbiza wamtshaya ngayo kanengi emzimbeni wonke.
Ngenxa yalokho, uNdlovu wabalekela.
Mhlaka 16 Nkwenkwezi ngehola lesikhombisa ntambama, uMoyo waya eMahangula Line lapho umkakhe ayesephephele khona, ephethe ihloka, ibhemba lenkonxa eyayilephetulo engamalitha amahlanu.
UMguni uthe ekufikeni kwakhe emzini kwabozala, uMoyo wacela ukubona umkakhe basebephuma phandle kweguma bayakhuluma.
“Kwaqhamuka ingxabano phakathi kwabo kwathi umsolwa watshaya umkakhe ngehloka, efuna imali yamalobolo, wabuye wathi uzabulala loba ngubani wakwabozala nxa bengehluleka ukumphendukisa imali yakhe yamalobolo.”
UNdlovu kubikwa wabaleka wayacatsha kwelinye ikamelo, abazali bakhe bona bangena endlini eyayilamakamelo amathathu bazivalela phakathi.
UMguni uthe uMoyo walaya abantu laba, abathathu ukuthi bavule umnyango kodwa bala ukuvula, wasebenzisa ihloka ukuzama ukuwubulala kodwa wehluleka.
“Wenelisa ukuvula ifasitela wathela iphethulo phakathi kwaleyondlu wayilumathisa,” kutsho uMguni.
Abantu laba abathathu kuthiwa bavula umnyango baphuma endlini eyayisitsha, bephethe umntwana oleminyaka emibili.
Kubikwa uMoyo wahlasela umkakhe ngomphini wehloka emzimbeni kanye lekhanda.
Wabuya watshaya umntwana kanye entanyeni, okwenza umntwana waba lenxeba.
UMguni uthe uNdlovu watsha kakhulu esifubeni, esiswini, lesandleni sokudla okwabangela ukuthi ahanjiswe esibhedlela.
Kubikwa umsolwa wathi ebona izakhamizi sezizobona okwakusenzakala wahle wacela ezinyaweni.
UNdlovu, owayelaliswe esibhedlela seTsholotsho, kuthiwa wacela ukukhutshwa engakapholisisi.
Kodwa mhlaka 15 Mpandula 2026, ngehola lesithathu emini, uNdlovu wedlula emhlabeni ngenxa yamanxeba ayelawo.
UMguni utshele inkundla ukuthi uMoyo wathi esezwe ngokufa komkakhe waya emgwaqweni lapho okusolwa ukuthi waziphosa phambi kwebhasi, ezama ukuzibulala.
Walimala wahanjiswa esibhedlela lapho elatshwa khona.
