adminYiNtatheli kaMthunywa
IPHUPHO likaEdmore Chirambadare lokuyadlala ezweni leSouth Africa selifezekile nanko phela lumdlali usezadlala eSoweto ngemva kokusayina kuqembu leKaizer okweminyaka emithathu elandelayo.
Umdlali lo, ekhuluma loMthunywa ngoLwesibili ubike ukuthi kade wakhulekela ukuthi asuke kuleli ayedinga impilo engcono eGoli kumdlalo kanobhutshuzwayo.
“Ngiyajabula bakithi ngoba ukusayina kuKaizer Chiefs kugcwalise iphupho lami lokufisa ukuyadlalela eSouth Africa.
Ngokwami ngakhula ngisekela iKaizer Chiefs.
“Ngisuka kuleli ngisuthisekile ngokudlala engakwenza ngikumaqembu eTsholotsho FC leChicken Inn,” kutsho uChirambadare.
UChirambadare uselandele abanye abadlali asebegiqa ibhola beseMzansi. Umdlali owavusa ibizo lakhe ekuTsholotsho FC, uvume ukudlalela Amakhosi ngoMvulo kuliviki. Bekusaziwa ukuthi uBobby Motaung, isikhulu seKaizer Chiefs uzathenga umdlali lo kanye lomunye wakhe uMitchell Katsvairo.
Abadlali bobabili kulisizini bebedlalela iqembu leChicken Inn elilahlekelwe langumqeqetshi wayo owayinceda yathwala inkezo yeCastle ngesizini ka2015.
UChirambadare loKatsvairo bayingxenye yabadlali abaqanjwe yiKaizer Chiefs abazaba semabhukwini ayo ngesizini ezayo kulandela ukudiliza abadlali abangu-20.
UMotaung, ngokubambisana lomqeqetshi uSteve Komphela, bamemezele abatsha laba phambi kwenkundla yabasekeli. UChirambadare utshayelwe ihlombe ngesikhathi abasekeli bebuka ijesi lakhe elilenombolo u-11, eyayingekaKnowledge Musona umdlali we-Zimbabwe owatshiya iKaizer Chiefs iliqembu elihlonitshwayo kusizini ka2011.
Injongo yokuthenga uChirambadare loKatsvairo ngokutsho kukaMotaung yikuthi Amakhosi afuna ukuguqula iqembu ukuze ikwazi ukuhlasela kakutsha ngesizini ka2016/17.
Abanye abadlali abathengwe yiKaizer Chiefs nguRamahlwe Mphahlele, Enocent Mkhabela, Emmanuel Letlotlo, Sibusiso Khumalo, Lewis Macha, Edmore Chirambadare lo Mitchel Katsvairo.
Online Reporter