admin
Johas Moyo
ABE-VETERINARY Services koBulawayo baqhuba umkhosi wokuhlaba izinja ukuze kwenqatshelwe umkhuhlane wobhova.
Umkhankaso lo uqalise ngeviki ephelileyo njalo ukhangelelwe ukugqitshwa mhlaka 8 Mpandula.
Kubikwa okubangele ukuthi kuqhutshwe uhlelo lolu yikuthi sekulabantu abangu-14 khonapha koBulawayo asebelunywe yizinja okucatshangelwa ukuthi zilobhova kuthi eNkayi khona kulabantu abangu-5, eLupane 2, eBubi 2, kanye leMguza 3.
Mhlaka 8 izinja ziyabe zihlatshwa eNtumbane emapholiseni akule indawo kanye lasezitolo zakoNhliziyo.
Ekhuluma lentatheli kaMthunywa uDokotela wezifuyo uNdabezinhle Mkhwananzi uchaze ukuthi umkhuhlane wobhova ubangelwa ligcikwane elihlasela izinja okwenza ziguqule izenzo zazo njalo lokho kwenza zibe yingozi kumphakathi.
“Njengenhlanganiso kungumlandu wethu ukuvikela izifuyo ngazo zonke indlela.
Ngokunjalo sikhuthaza izakhamizi zonke ukuthi zihlabise izinja zazo ukuze zivikeleke kumkhuhlane wobhova kanye leminye nje imikhuhlane etholakalayo ezifuyweni.
UDkt Mkhwananzi uveze ukuthi labo abazekela ukuhlabisa izinja zabo bazabotshwa ngoba kulicala njalo kuyingozi ukuhlala lezinja ezilobhova.
“Kulicala elikhulu ukwekela ukuhlabisa izinja ngoba nxa kungenzakala ukuthi ilume umuntu kunzima ukuthi elapheke.
“Umkhuhlane wobhova uhlasela ingqondo okwenza ukuthi lowo olunyiweyo acine esehlanya kumbe acine esifa,” kulandisa uDkt Mkhwananzi.
“Kuvamile ukuthi abantu badlale lezinja emakhaya kodwa kubalulekile ukuthi baqaphele ngoba nxa ingamdlepha ingahlatshwanga ijekiseni le isilonda sakhona kunzima ukuthi siphole.
Uqhubekele phambili esithi inja esihlaselwe ngumkhuhlane wobhova ilakho ukuthamba iswele amandla kukanti njalo iyabe igxoza indenda.
Uphethe ngokukhuthaza izakhamizi ukuthi nxa kungenzeka ukuthi umuntu alunywe yinja elobhova kumele ahle ageze ngamanzi alesepa akhuhle kakhulu aphinde ayehlatshwa lamajekiseni aphiwe lamaphilisi okuncindezela ubuhlungu.
Online Reporter