Online Reporter
Nkosilathi Sibanda
IZAKHAMIZI zeLobengula West koBulawayo zikhangelele ukuqhuba umkhankaso wokuxwayisa abantu ngokulwisana lodubo lokusebenzisa izidakamizwa lotshwala, oselubhahile kulindawo.
Umkhankaso lo ozabe ungoMvulo ngeviki ezayo, uqoqwe yihofisi kakhansila kaWard 29 leLobengula West Mountain View Residents Association.
Uza ngesikhathi ukusetshenziswa kwezidakamizwa sekuphenduke insakavukela umchilo wesidwaba endaweni ezinengi, ezweni lonke. Lokhu sekwenze loHulumende wangenela ekulwisaneni lomkhuba lo osudilize umphakathi, ikakhulu impilo yabasakhulayo.
Ukhansila ka-Ward 29, uRoyini Sekete ukhiphe umbiko wokuthi kube lokubambisana ukuze kuqhutshwe umkhankaso enzikini yezitolo zeMountain View kulelilokitshi.
“Sihlela umkhankaso wokulwisana lokusetshenziswa kwezidakamizwa mhlaka 26 Nkwenkwezi, eLobengula West Mountain View Shopping Centre.
“Sicela usekelo lwenu ukuze umkhankaso lo ube yimpumelelo. Ukuzinikela kwenu lani kuzaphathisa ukuthi sinxuse izikhulumi eziyingcitshi, sihlele imikhankaso yemfundiso kube lemibukiso.
“Sihlose njalo lokusiza labo abakhahlanyezwe yizidakamizwa, sinciphise ukusetshenziswa kwezidakamizwa lenkinga eziphathelane lalokho,” kutsho uKhansila Sekete encwadini yakhe.
Inkinga yezidakamizwa eLobengula West kayiqalisi. Eminyakeni edluleyo inengi labasakhulayo selonakala ngemva kokusebenzisa izidakamizwa eziyingozi, lokunatha utshwala okwedlulisileyo.
Okuvusa amehlo yikuthi sezinengi indawo lapho okuthengiswa khona izidakamizwa elokitshini leLobengula, osekukhathaze kakhulu abafundisi bamabandla okholo, abazali, amaqembu omphakathi lamapholisa.
Kumizamo yokulwisana lodubo lokusetshenziswa kwezidakamizwa, uHulumende esebenzisana lekhansili yakoBulawayo nyakenye, wethule uhlelo lokuguqula izakhiwo ezingasasetshenziswayo kulelidolobho zibe yindawo zokwelapha abahlutshwa yizidakamizwa.
Enye i-Ward yesibhedlela seNgutsheni ingenye yezindawo ezizaguqulwa zibe ngezokwelapha. Ezinye kuseMakhandeni laseLobengula.
