admin
Mthokozisi Dube
KUKHANYA ukuhuquluzwa kwemali zesikolo ngabaphathisikolo kuyaphambili nanko phela sokuvele njalo ukuthi umphathi weMathetshaneni eNkayi usetshayele esikhewini imali engaba yi-$22 000, uMthunywa uyakuveza lokhu lamhlanje.
Kubikwa umphathi lo, uMnumzana Siza Nkomo usehuquluze imali zezikolo ezimbili, i$1 000 yeMathetshaneni Primary School le$21 000 yeSagonda lapho ayengumphathi khona engakatshintshelwa eNkayi.
UMthunywa uxhumane lezakhamizi zona ezibike ukuba sezikhathele ngokubhadala imali ewela emlindini ezingawuboniyo okuyikho okwenza zakhonona kwabezemfundo.
Kubikwa ngemva kokukhonona kwabazali umnyango wezemfundo wathumela ababona ngokusetshenziswa kwezimali (auditors) ukuthi ayehlola ukusetshenziswa kwemali ezikolo lezi okwenza avumbulula ukuthi kulemali engange-$1 000 okungaqedisisekiyo ukuthi yasebenzani andubana badlulele esikolo seSagonda lapho asuka khona bathola ukuthi wahuquluza i$21 000.
Kucatshangelwa njalo ukuthi umphathisikolo lo uyimvelakanci ilihlo lentwala nanko phela kwesinye isikhathi uyaqeda iviki engalugxobi esikolo.
“Njengabazali silandela emuva kweSDC kodwa nxa ingathathi amanyathelo ngoNkomo thina sizakuyamdudula ngoba asingeke sisebenzele eyinye indoda thina lathi sizihluphekela,” kubika omunye umzali ozichaze ngokuthi nguNcube nje kuphela.
Omunye njalo umzali othe uvela ukuyazwisisa ngamanyathelo asethethwe ukuze umphathi lo abisele imali yesikolo.
“Okusidida ingqondo njengabazali yikuthi umuntu adle imali yethu athi amagqwetha akhe athe ayibhadale, thina sithi akaphume aphele esikolo sethu,” kuchaza uNamaDube ecingweni.
Abanye njalo abazali abaxhumane loMthunywa basole iSDC ukuthi ukuthulisela kwayo kungabe kuchaza ukuthi bayihlephunelwa leyo mali.
Ekhuluma lentatheli obemele umqondisi wezemfundo esabelweni seMatabeleland North, uMnumzana Jabulani Mpofu ubike ukuba imali eyahuquluzwayo akayazi ukuba yimalini kodwa akwaziyo yikuthi ama-auditors ahamba ngempela kulesisikolo.
Online Reporter