admin
UKOMA kwezomnotho welizwe sekubangele ukuthi kuswelakale imali emabhanga, kungakho ukulethwa kwama-bond notes kungaphathisa kakhulu uzulu onguye ohlatshwa kakhulu ngumkhonto wokusilela kwemali.
UGavuna webhanga elikhulu eleReserve Bank uDokotela John Mangudya wethula umbiko wokuthi ilizwe lizasebenzisa imali yakwamanye amazwe ndawonye lama-bond notes wona azancedisa ukwehlisa ukusilela kwemali elizweni kodwa umphakathi wahlaba umkhosi usithi kuyisibonelo sokuphenduka kwe-Zim dollar lona elatshiya uzulu elahlekelwe yimali enengi.
Khathesi sokusobala ukuthi kukhona okumele kwenziwe masinya ngokusilela kwemali nanko phela ezinye izisebenzi zikaHulumende kuyonale inyanga sekuvele ukuba zizahola kunyanga ezayo ngesizatho esifanayo.
Nxa benganakana ukukhalala imisebenzi, kuyini okuzenzakala? Nxa kusezibhedlela wonke umuntu uyazi ukuthi kuyini okuzenzakala. Abantu bazakufa baphele du.
Kungumbono woMthunywa ukuthi uzulu amukele ama-bond notes lawo kulalokho okukhona kodwa ibhanga elikhulu lenze kube lendlela ezenza ukuthi kungagcwali osiphatheleni ezitaladeni.
Ama-bond notes la akhangelelwe ukuqeda imisila emide emabhanga yona esibangele ukuthi abantu balale belindile eminyango yamabhanga.
Kungumbono woMthunywa ukuthi ukusetshenziswa kwama-bond notes kuzehlisa ukuthenga impahla ongazifuniyo ezitolo njengalokho inengi labantu ebeselicina lithatha impahla ngoba lingenelisi ukuthatha imali emabhanga.
Ukuthatha impahla lakho besokusenza kubenzima ukuthi abantu babhadale ngani imali ezifunakalayo ezikolo kanye le-rent njalo bekukhipha abantu abanengi kubhajethi (budget).
Ukusetshenziswa kwama-bond notes kanye lezinye imali kumele kubonakale njengendlela engcono kodwa ilizwe lisebenzise njalo i-plastic money yona esetshenziswa kakhulu kwamanye amazwe ngoba isenza abantu bangatshontshelwa.
Ensukwini ezedluleyo abafundi kumakolitshi atshiyeneyo bebecina besenza ama-transfers lapho abebekhiphela imali zabo kwamanye amabhanga ngoba kunzima ukuthi bazithole. Kungakho lokhu kungaqedwa kuphela ngokwamukela ama-bond notes.
Okuqakathekileyo ngalesi isikhathi ilizwe liphakathi kobunzima bezomnotho ngenxa yezijeziso zomnotho yikuthi kuhlanganiswe amakhanda ndawonye kulokuthi ezinye inhlanganiso zikhankasele ukuthi ama-bond notes angangeni.
Asamukeleni limali sibone ukuthi izasinceda njani njalo sikhuthaze uHulumende ukuba ahlole njalo enze bonke osomabhizimusi bafake imali yabo emabhanga akuleli hatshi ukuthi bayibisele phandle kwelizwe.
UMongameli welizwe uke waphuma kumaphephandaba esola osomabhizimusi abenza lumkhuba omubi kangaka, kungakho asimxhaseni ukuze isizwe sethu sikhule. Simtshayela ihlombe njalo ngokuthi kwehliswe imali ezibhadaliswa abantu emabhanga ngoba lokhu sokuphathise uzulu.
Online Reporter