UMthimkhulu uthengela abadlali ama-pads

YiNtatheli kaMthunywa
AMANTOMBAZANA adlala unobhutshuzwayo asethole usizo lwempahla yama-pads oluvela kusikhulu wamapholisa eZRP uAssistant Commissioner Sithulisiwe Mthimkhulu.

Isikhulu samapholisa lesi sithe sikhethe ukuthi siqine ngokusekela amantombazana ngenxa yokuthi abanengi bagijimela ukusekela ibhola labafana.

Isipho sikaMthimkhulu sizakuya kumaqembu alitshumi lambili abalisa iNew Orleans, Barrow Jets, Highlanders Royals, Magwegwe, ZRP, Street Sets, Mpopoma High School, Sobukhazi, eNtumbane, Ubuntu, Hearts of Oak leBiya and Friends.

Ekhuluma ngesikhathi enikeza isipho lesi kunhlanganiso yeFootball Union of Zimbabwe (Fuz) uAsst Comm Mthimkhulu uthe kuqakathekile ukukhumbula bonke abadlali abahlaselwe yikuswela imali ngesikhathi se-Covid-19 esivalele impilakahle yabe zemidlalo.

UMthimkhulu waziwa njengomsekeli onzima kunguqu. Usencedise ngempahla yenguqu kumaqembu asemaphandleni, ikakhulu kuzabelo zeMatabeleland North le Matabeleland South.

“Labadlali abangamantombazana bayalufuna uncedo. Ngilethe isikhalazo kubomama ukuthi nxa sisenelisa ukuthi sithenge nje iphakethi elilodwa, singancedisa abadlali bethu.”

UNomsa Moyo okunhlanganiso yeFuz koBulawayo ongomunye wabamukele isipho, uthe:

“Ngalesi isikhathi inengi labadlali lithwele nzima ngoba akula lapho elingathola khona imali. Imidlalo ivaliwe ngakho kunzima. Sibonga isipho esivela kuAsst Comm Mthimkhulu. Silethemba lokuthi kuzakuba labasekeli abalomusa njengoMthimkhulu ukuze impilo zabadlali zihlale zilesithunzi,” nguMoyo lo olodumo lokudlalela isizwe lokuthuthukisa amalungelo abadlali abangamantombazana.