admin
Bongani Ndlovu
ISELE iphethe izibindi ngezandla enye indoda yeIrisvale kuVillage Besigabeni seMzingwane ngemva kokuthola indaba zokuba umuzi wangakibo ubusuyisigodlo sabathakathi.
Iphephandaba likazulu lizwe ukuba imuli kaLimukani Sibanda ibingasabuquthi ngitsho ubuthongo ngenxa yomsindo wabantu abayabe bekhuluma kanye lezisindo zezinyamazana kodwa isimanga yikuthi bebethi nxa bephuma phandle besiyakhangela bebengaboni lutho.
Kubikwa ngenxa yalokhu uMnu Sibanda wahamba wayacela uncedo kusobhuku okwenza kwacina kubizwe otsikamutanda abayibo abaveza ukuba umuzi wakoSibanda ubusuphenduke waba yindawo yokuhlanganela abathakathi.
Ekhuluma lephephandaba likazulu uMnu Sibanda ubikele uMthunywa ukuthi bekungasalaleki emzini wakhe ngemisindo ebusuku.
“Mina ngingumuntu ozisebenzayo njalo ngisebenza ngitshintsha indawo zokuhlala kodwa sonke sikhathi nxa ngifika ngekhaya bengisiba lobunzima bokulala kungakho-ke besekungikhathaza ndawonye lemuli yami.
“Kwezinye insuku besisizwa abantu bexoxa phandle kwekamelo lethu lokulala kumbe sizwe umsindo wezinyamazana kodwa nxa sivuka singaboni lutho ngakho ngaya kusobhuku ngacela ukuthi kudingwe icebo ngoba bekungayisimi ngedwa olohlupho olunjalo,” kuveza uMnu Sibanda.
Uqhubeke waveza ukuba ekufikeni otsikamutanda yibo abavezayo ukuba ikhaya beselisiba ngumtolo.
“Otsikamutanda yibo abafika basitshela ukuba umuzi wami ubusuyisigodlo sabathakathi,” kuveza uMnu Sibanda.
Intatheli ibuye yaxoxa loSobhuku wesigaba uMnumzana Mehluli Ndlovu ovumileyo loludaba lolwazi lalo.
“Kuliqiniso ukuba uMnu Sibanda wangilanda ekhala ngohlupho alalo emzini wakhe lokungalali, wasecela ukuba nxa kuvuma sibize osiyazi njengoba kuyimi umkhokheli wesigaba.
“Ngemva kokubizwa kwabosiyazi sokulokuthula emzini kaSibanda, alusekho uhlupho lomsindo webusuku,” kuchaza uSobhuku uNdlovu.
Ekhuluma lentatheli uMphurofethi uMuzi Sibanda uvumile ukuba abathakathi besebezenzela umtolo emzini kaSibanda.
“Abathakathi labo ngabantu abalezimfihlo ngakho besebezenzela umtolo wabo emzini kaLimukani ngoba engumuntu ongahlali ekhona ekhaya,” kuveza umphurofethi.
Online Reporter