admin
Intatheli KaMthunywa
UPRINCE Dube uzakuba ngumdlali odula kulabo bonke kumbali yeHighlanders nanko phela kukhangelelwe ukuthi atshiyele iqembu elamkhulisayo leli i-US$30 000.
Umdlali lo obetshibilika kuHighlanders kungenzeka ajabulise abaqeqetshi beqembu le-Shaanxi Chang’an Athletic leChina kumaviki amabili azayo.
Kuyisifiso salumdlali ukuthi aphumelele ukudlalela eChina njengoba kwehlula ukuthi adlale e-South Africa lasemazweni e-Europe.
Umgadli lo kubikwa ufike wahlaliseka kwele-China lapho asedinga khona amadlelo angcono, okuveza ukuthi angeke walugxoba kuTshilamoya okwesizini elandelayo.
Umdlali lo odume ngelithi “Mgadafi” enkundleni wasuka kumaviki amathathu adluleyo enxuswe ngabacuphi abathile abajonge ukuthi bamdingele iqembu kulelo lizwe.
Abafakazi abaqotho abakhulume lephephandaba likazulu bathe umdlali lo ufike wajabulisa abaqeqetshi bamathimu athize abalisa le-Shanghai SIPG le-Beijing Guoan.
Nxa engaphumelela ukuthi asayine kuqembu le-Shaanxi Chang’an Athletic uDube uzabe engumdlali wakuqala ophume kwekaMatshobana ukuthi adlale kwele-China.
“Ufike wahlaliseka uPrince eChina. Ngiyakuveza ukuthi ngomnyaka ozayo sizakuzwa indaba ezimnandi zokuthi usesayine lelinye lamaqembu khonale. Okwamanje kunzima ukuthi siveze iqembu kumbe amaqembu asemkhangele ngoba asifuni kuphambanisa ingxoxo ezikhona,” kutsho lumfakazi oseduzane lodaba lolu.
Umfakazi lo uthe loba uPrince ezaphenduka ekhaya, akutsho ukuthi uzabe ehlulekile kodwa kuzalindwa ukuthi kuqhubekwa njani ngomkhankaso wakhe wokudinga amadlelo aluhlaza.
Isikhulumi seHighlanders uRonald Moyo wazise ukuba angeke batsho okunengi ngohambo lukaMgadafi.
UMgadafi uqede isizini kuhle nanko phela ukhethwe waba ngumdlali wesibili owenze kahle kukhalenda yeligi yeCastle Lager.
Ubeyinsika yokuqansa kweHighlanders kulandela ukuza komqeqetshi uHendrik Pieter de Jongh, umqeqetshi lo obizwa okuthiwa nguHlabangana, oseyifulathele iBosso eqonde ku-FC Platinum.
Online Reporter