Usane ludojwa lujikelwe kuMazayi

Johas Moyo
KUSIGA esihlasimulisa umzimba esingundaba mlonyeni elokitshini elidala leMakokoba edolobheni lakoBulawayo zilokhe zimadolo nzima njalo zikhathazekile izakhamizi kulandela ukudojwa kwesidumbu sosane sesonakele esifuleni esaziwa ngokuthi nguMazayi.Isiga lesi senzakale ngoMvulo kuyonale iviki esifuleni lesi esehlukanisa ilokitshi leMakokoba leMzilikazi.

Kubikwa usane lolu luqale ukubonwa ngabafana akade bedlala ibhola ku-11th Street elokitshini leli abayibo ababikele izakhamizi.

UMthunywa esizwa ngendaba le, uphuthume wayafika khona lapho afice khona abantu bemi amadlodlongwane behlahle lamehlo ngenxa yesihluku lesi.

Ekhuluma ngalesisiga uMnumzana Philip Ncube ubonise ukudana ngosekusenziwa ngabesintwana waphinda wasola kakhulu isilisa esihamba sitshaphaza abantwana babantu okuyikho okubangela inhlupho ezinjalo.

“Ngidanile njalo kangenelisi lokudla ngengikubonileyo lamhlanje. Kambe umuntu abelesibindi sokuthwala umntwana inyanga eziyisificamunwe munye kodwa amlahle ekucineni.

Abantu balezibindi sibili, abanye bayabafuna abantwana bayabaswela kodwa abanye bayabalahla,” kutsho uMnu Ncube.

Esinye isakhamuzi seBurombo Flats laso esikhulume loMthunywa, uNkosazana Lydia Sikhosana uveze ukukhathazeka ngokulahlwa kosane olungelacala wathi kungenzakala ukuthi lulahlelwe endaweni ekhatshana lwahamba lwamanzi lwaze lwafika lapho olubonakale khona.

“Amapholisa kenze umsebenzi wawo kubonakale onguye oluphosele emanzini, ngoba umntwana lo untshezile wahamba lamanzi.

“Kungenzakala ukuthi uphoselwe ehlangothini lweThorngroove wasesiza lamanzi lapha. Amapholisa kachwayisise kubanjwe isigangi,” kutsho uNkszn Sikhosana.

UMthunywa uxoxisane logogo uMaNdebele othengisa eduze lakuleyo ndawo okwenzakale khona isiga lesi yena obike ukuthi ulokhe engela nkani njalo utshe amathe ngehlazo eselisenziwa ngabesintwana.

“Ngilokhe ngingelankani ngalokhu esikubonileyo lapha. Kambe abantwana bakulezinsuku amafoni abo alama-password amanengi kodwa izinqe zabo kazivalwanga okwenza bacine belahla ingane ezimsulwa.

“Kasikhuzaneni bantu emakhaya ngoba siyazana njalo olesisu uyabe umazi kodwa  nxa selahle umntwana kawumkhuzi, ngidaniswa yikuthi ngileminyaka ngithengisa lapha kodwa kangikaze ngibone into enje,” kutsho ugogo uMaNdebele.

Omele isikhulumi samapholisa uAssistant Inspector Garikai Chipfunde uthe kabakawamukeli umbiko lo.