Online Reporter
Lovemore Dube
IQEMBU leHighlanders libike ukuthi umaqhuzu walo uDenzil Mnkandla useqalisile umsebenzi, ngemva kokwesulwa kwamacala abewetheswa.
UMnkandla uphenduka ngemva kokuhlala isikhathi eside engekho emsebenzini.
Ubesetheswa amacala athile kulandela uhambo lweqembu lokuya eBotswana phambi kokuqala kwesizini ka-2026.
Obambe isikhundla sikamgcinisihlalo weqembu uKindman Ndlovu ufakaze ukuthi uMnkandla usesebenza kuqembu elidala.
Uphendukiswe emsebenzini ngemva kokuba iqembu seliphiwe umbono ngamacala akade ewetheswa.
Ocebisa iHighlanders kulokho wathi udaba lolu alulabufakazi kungakho kuzakuba nzima ukuthi luyethonisiswa emthethwandaba ngoba lungadonsela iqembu edakeni.
“Ngemva kokuchwayisisa indlela zokusebenza zeqembu, amacala aqondane lokusebenza asehlisiwe.
UMnkandla usekhona njalo usebenza gadalala,” nguNdlovu lo ebuzwa liphephandaba likazulu.
Ubuye wengezelela wathi amacala aseleyo yilawo asezandleni zamapholisa.
UNdlovu uthe bazaphathisana lamapholisa.
Indaba le, yayihanjiswe emapholiseni kuCommercial Crimes Department abayibo abasele lengqobe.
Ekuqaleni komnyaka iHighlanders ivakatshele eBotswana isiyalungiselela okomnyaka lo. Kwaba lababesebenzisana loMnkandla abayibo abakhulumisana labendawo zokuhlala khonale.
Inkokheli zalungisa zabona lokuthi imali ziyaphuma iqembu lahamba lequla elacina lifika ku-63 kwaba lendleko eziphezulu kwe-US$50 000. Babekhangelelwe ukuhlala amalanga alitshumi kodwa bacina behlala iviki.
