admin
YiNtatheli kaMthunywa
ZISELE isele zithithibele izakhamizi zeMpandeni esigabeni seMangwe ePlumtree kulandela ukuzwa ngesiga sezigelekeqe ezigqekeze emzini welinye ikhehla lomkalo zababulala andubana zibatshisele endlini.
Isiga lesi esenzakale ngoLwesibili ebusuku sitshiye uMnumzana Nicholas Nleya (83) kanye loNkosikazi wakhe uMargaret (78) betshiswe kwasala umlotha emzini wabo oseMzaza khonale eMpandeni.
Lanxa kungakacaci ukuthi kungani izigelekeqe lezi zihlasele imuli le kucatshangelwa ukuba zingabe bezifuna imali lokunye.
Izigelekeqe lezi zingene emzini lo ngemva kwehola lika 9 ebusuku zabulala ifasitela lendlini yokulala yabo andubana zitshiye zibulele laba ababili.
Isikhulumi samapholisa elizweni uAssistant Commissioner Paul Nyathi uthe bachwayisisa isehlakalo lapho owesilisa oleminyaka engu-83 lowesifazana ole-78 abahlaselwe yizigebenga zababulala.
“Izigelekeqe lezi kukhanya zafika zathi zifuna imali evela emazweni ethunyelwe ngabantwana. Abazukulu ababelapho omunye oleminyaka engu-19 omunye ole-16 babaleka bayabikela umakhelwane ekuphendukeni kwabo bathola indlu isisitsha,” kutsho uAsst Cmm Nyathi.
Uqhubekele phambili esithi kukhanya abetheswacala laba bebezwe udletshana lokuthi imuli le ithengise inkomo eziyisikhombisa.
“Kukhanya abetheswacala bebezwe udletshana lokuthi imuli le ithengise inkomo yikho nje befike bathi bafuna imali. Sicela njalo abangabe belolwazi ngezigebenga lezi ukuthi bayebikela amapholisa aseduzane labo ukuze babotshwe,” kuphetha uAsst Comm Nyathi.
Online Reporter