admin
Ethel Ncube
KULENDODA yeRedbank indawo eseNyamandlovu ephose yaya kwelabokhokho ngemva kokuba umzukulu wayo enakane ukuyitshisela endlini kubangwa intombi.
Indaba le yenzakale ekuqaleni kwawonalo umnyaka lapho uVusa Moyo exabane lomalumakhe u-Aniel Sibanda kubangwa ukuthi ukhombise intombi yakhe.
Ekhuluma loMthunywa omunye wezakhamizi zakule indawo owahamba esiyancedisa ukucitsha umlilo indlu isisitsha uMnumzana Phineas Ncube uveze ukuba balamula oluphuphumayo mhlalokhu.
“Sagijima sibona indlu isithunqa umlilo sathi sifika umzukulu eklololoda ethi: ‘lamuhla malume uyafela khonapho awuphumi’. Sagijima lenhlabathi lamanzi sicitsha sibulala lesivalo ukuthi umuntu ophakathi aphume kanti yena wayevele esethe nyelele kudala.
“Satshaya isivalo saze sawela phansi ukuthi aphume kanti akulamuntu. sasithi sicitsha uMoyo laye elumathisa kwamanye amacele ukuthi kungabi lalutho olusalayo,” kubika uMnu Ncube.
Uqhubekele phambili eveza ukuba indaba yentombi yiyo eyabaxabanisayo nanko phela umalume laye wayesephose amazwi kuntombi kaMoyo.
“USibanda nxa belandisa kuthiwa wahamba wayakhombisa intombi kaMoyo wathi kale uMoyo.
“Esizwa lokhu umzukulu wahle wafunga wagomela wathi uzakosa umalumakhe ngomlilo ukuze acine into yakhe yokufuna ukumudla izithende.
“Umalume laye uthe esizwa umzukulu efika emzini wakhe wananzelela ukuba isimo sibi wabhoda ngale kwendlu wacela ezinyaweni,” kutsho uMnu Ncube.
Intatheli iphinde yaxhumana loMnu Gift Moyo onguye owayesethathelwa intombi yakhe owale ukukhuluma ecingweni.
“Akulanto engingayitsho kuwe,” kubika uMnu Moyo ebeka ucingo phansi.
Imizamo yokukhulumisana loMnumzana Sibanda onguye owasethathela umzukulu umfazi yehlule ngoba engatholakali ecingweni.
Online Reporter