admin
YiNtatheli kaMthunywa
ZISELE zitshe amathe izakhamizi zesigabeni seMbembeswana eLupane kulandela ukutholakala kwenye indoda yakule indawo ifile emasimini isikwe amakhala, umlomo, inwele zitshisiwe.
Isehlakalo lesi esitshiye izakhamizi zakule indawo ziphethe izibindi ngezandla senzakale kuviki ephelileyo lapho uAmos Luphahla atholakale efile engelamlomo lamakhala okwenza kucatshangelwe ukuthi kulomuntu olesandla ekufeni kwakhe.
Kucatshangelwa ukuthi uLuphahla angabe ebulewe ngumuntu olomhawu nanko phela ubesaziwa esigabeni ngokutshaya amabele minyaka yonke. Kungakho-ke lowomuntu angabe esebenzise izitho zakhe aziqumileyo ukuvubela ngakho inhlanyelo yakhe.
UMthunywa ukhulumisane loMnumzana Oliver Luphahla oyisihlobo sikamuyi walandisa ngokufa kwakhe ethi bezwa ngomntakamakhelwane ukuthi uthe utshaywa ngabantu kodwa isimanga yikuthi lowomntwana wayengababoni labobantu.
“ULuphahla wasuka emini esiyatshisa amabibi emasimini kodwa kazange aphenduke. Ntambama sananzelela ukuthi ubaba omncane wayengekho sasesibikela abanye omakhelwane sayamdinga,” kulandisa uOliver.
Uqhubekele phambili wathi ngehola lesificaminwe mibili bamthola efile eduze lothango esikwe umlomo lamakhala, eqanyeliswe isigodo wabuya waphahlwa ngezinye izigodo njalo etshiswe inwele.
“Safica isidumbu sikababa singelamlomo, lamakhala njalo lenwele zitshisiwe kodwa isimanga yikuthi bekungela nyawo lomuntu kuleyo ndawo,” kutsho uOliver.
Omunye umakhelwane kaLuphahla uNkosazana Cecilia Ndlovu ubikele uMthunywa ukuthi umntanakhe uthi wamncedisa ukucitsha umlilo ngemva kwalokho wathi kulabantu abamtshayayo wasebaleka.
“Kwathi ngemva kokutholakala kukaLuphahla efile umntanami wathi umthole ecitsha umlilo emini wamncedisa ngemva kwalokho wezwa sesithi kulabantu abamtshayayo abafuna ukumbulala wabaleka wamtshiya. Kutsho ukuthi okwenza wangakhulumi ngesikhathi efika yikuthi wayesesaba njengoba engumntwana omncane,” kutsho uNkszn Ndlovu.
Ekhuluma loMthunywa uMnumzana Delani Luphahla ongumfowabo kamuyi uthe ngeke bahlalela isiga lesi ngakho okwenzileyo kasoze alidle ihlobo kanye lemuli yakhe.
“Indaba yokufa komnewethu ngeke siyihlalele ngoba singaphela sonke sibili. Ngalokhu ke ombuleleyo kasoze alidle ihlobo njalo uzalandelwa yimuli yakhe kuze kubonakale emphakathini ukuthi ugangile. Amakhala lomlomo komnewethu bazakubhadalela kuphela,” kutsho uMnu Delani.
Imizamo yokukhulumisana lesikhulumi samapholisa esabelweni seMatabeleland North yehlule.
Online Reporter