admin
Cornelius Luphahla
KWENZAKALE insindabaphenduli yendaba esigabeni sakoHobodo ePlumtree lapho enye indoda etshiswe ngamafutha ngumkayo ngemva kokuzwa ukuthi ithandana lomakhwapheni ophinda ajole lomkhwenyana wayo.
Isiga lesi senzakale kuviki ephelileyo lapho uMnumzana Milton Ncube obehlanyisana loNkosazana Liznet Ngwenya ongumazakhela njalo engumakhwapheni kamkhwenyana wakhe uMnumzana Brian Mhlophe okudale ukuthi umkhwenyana lo abikele umkakhe.
UNcube uthethe uNkosazana Siphiwe Ndlovu.
Kuzwakale ukuthi umkhwenyana lo ubefuna ukuthatha umntakaNcube uBeauty Ncube noma nje ubengakaziwa koyisezala.
Kusenjalo uMhlophe esesazi ukuthi uNkosazana Ngwenya athandana laye ujola njalo loNcube wabikela uBeauty owahle watshela unina.
UMthunywa ukhulumisane loMnumzana Sipho Nkomo oyisakhamuzi sakule indawo wachaza ukuthi uMnu Ncube ubeselesikhathi eside ethandana loNkszn Ngwenya kodwa babengakwazi ukuthi “basesithenjini” lomkhwenyana wakhe.
“UNcube ubeselesikhathi eside ethandana loMaNgwenya noma nje umkakhe ubengakwazi. Into ephambanise indaba le yikuthi lomkhwenyana wakhe ubesethandana loMaNgwenya, yikho okudale ukuthi indaba le ivele.
“UMhlophe nguye owatshela uBeauty ngalindaba okwenza uMaNdlovu wacina emtshisa ngamafutha.
“Khathesi uNcube usesibhedlela sePlumtree,” kutsho UMnu Nkomo.
Kuzwakale ukuthi kuthe ngemva kokutshiswa kukaNcube ngamafutha uMnu Mhlophe uhle watshaya utshani.
Ebuzwa ngale indaba uNkszn Beauty Ncube walile ukuthi nguye owatshela unina ngendaba yokujola kukayise njalo kazi lutho ngakho.
“Mina kangizange ngatshela umama ngendaba yokujola kukababa loMaNgwenya ngoba kayisikho kwami. Mina indaba zikamama lobaba kangizingeni.
“Ukuthi ijaha lami lithandana loMaNgwenya kangikwazi njalo kangikuthembi ngoba uMaNgwenya ngumuntu omdala kakhulu okokuthi ngeke athandane laye njengoba elingana labantwabakhe,” kutsho uNkszn Ncube.
Usobhuku wakule indawo uMnumzana Fanwell Dube ebuzwa ngale indaba uvumile ukuthi uyayazi.
“Kuliqiniso sibili ukuthi uNcube utshiswe ngumkakhe ngamafutha ethi ubesethandana lesinye isakhamuzi sakhonapha kodwa indaba le kabazange bayiletha kimi ngakho okunengi kangikwazi,” kutsho uMnu Dube.
Online Reporter