admin
Yintatheli kaMthunywa
ABABUKELI bomdlalo obudibanise iHighlanders leChicken Inn bazibonele ukuthi uSimon Munawa usekhona kumdlalo webhola lenyawo.
Umdlali lo osebizwa ngokuthi ngu “Paul Scholes” ukhiphe umtshoko webhola elitshayelele ezandleni zikanozinti uAriel Sibanda, laphenduka lahlohlwa nguClemence Matawu.
Belitshisa lelibhola elitshiye abalandeli bethule zwi.
Inengi belicabangela ukuthi ngemva kokususwa kuBosso, lumdlali ubesephele umoya. Akula obecabangela ukuthi phakathi kwabo bonke abadlali beChicken Inn, uMunawa ubengaqhulula umtshoko. Lo ngumdlali ozwisa abanye babalandeli ubuhlungu ngoba ukususwa kwakhe eqenjini bekungakhangelelwanga.
UMunawa ubesebalelwa kubadlali abayibona iBosso uqobo.
Umdlali lo wazise intatheli ukuba usazophinda umphehlo wokutshaya imvema yamabhola egedini leBosso.
“Kuyavuma emdlalweni. Bengilikhangele igedi njalo ngisazi ukuthi unozinti angeke alibambe elami ibhola. Ngizaphinda njalo.”
Ukuze aphiwe leli ibizo, uMunawa wanconywa ngabaqeqetshi labonozindaba bezemidlalo kuleli abafananisa ukudlala lokuzimisela kwakhe kumasizini adluleyo njengo-Paul Scholes owake wadlalela iManchester United.
Umqeqetshi weChicken Inn uJoey Antipas uthe loba iBosso imkhiphe isiwiji emlonyeni, uzaqina ngokulolongela imidlalo yeligi.
Iligi yeCastle Lager ikhangelelwe ukuqalisa mhlaka 10 kuMbimbitho.
“Siyaqhubeka ngokulolonga. Inkuthazo yami kubadlali yikuthi balandele izixwayiso zami emdlalweni. Akumelanga bahlaliseke,” kutsho lumqeqetshi.
Online Reporter