Online Reporter
Thupeyo Muleya
VANHU vaviri vakatsva zvekutadza kuzivikanwa kuti ndivanani apo vamwe vaviri zvakare vakatsva zvakaipisisa mushure mekunge magonyeti maviri abonderana ndokubvira moto nemusi weChina manheru mumugwagwa Harare- Beitbridge pedyo nenzvimbo yeJoko.
Officer commanding Beitbridge district, Chief Superitendent Mesuli Ncube, vanotsinhira nyaya iyi.
“Zvinotaridza kuti rimwe remagonyeti aya raibva kuHarare richienda kuBeitbridge riine mutyairi waro chete uye risina zvarakatakura,” vanodaro.
“Gonyeti rechipiri raive rakatakura chibage nevanhu vatatu.
“Pakusvika panzvimbo yeJoko, mutyairi aienda kuBeitbridge akanzvenga kuti asatsike mombe ndokubva aenda kudivi remugwagwa kwaiuya nerimwe gonyeti iri ndokubva vabonderana.
“Izvi zvakaita kuti motokari mbiri idzi dzibatire moto ndokubva mumwe wevatyairi ava nemunhu aive akatakurwa vatsva kusvika pakutadza kuzivikanwa kuti ndivanani. Mumwe wevanhu vaive vakatakurwa nemumwe mutyairi vakatsva zvakanyanya nemoto uyu.”
Chief Supt Ncube vanoti vaviri vakakuvara ava vakabva vamhanyiswa kuchipatara cheBeitbridge.
Vanoti kufeyewa kwenyaya iyi kuri kuenderera mberi.
