Online Reporter
Muchaneta Chimuka
VARUME vatatu vekuUnit O kuChitungwiza vekubatikidzwa nemapurisa vachiputa mbanje vari pamba pavo vakaigochera pautsi zvichitevera kusungwa kwavakaitwa uye ndokuzozvuzvurudzirwa kudare reko.
Ishmael Yeukai Paulos (31), Tinashe Churu naWitness Nyamana (27) vakamiswa mudare reChitungwiza Magistrates Court vachitarisana nemhosva yekuputa zvinodhaka.
Mutongi wedare iri, VaBatsirai Madzingira, vakavapa chirango chekukubvisa faindi yeUS$50 pamumwe nemumwe wavo uye kukundikana kwavo vachagara mujeri kwemwedzi mitatu.
Vakavatemera zvekare chirango chemwedzi mishanu icho vakasendeka chose parutivi nechitsidzo chekuti havafaniri kupara imwe mhosva yerudzi urwu makore mashanu asati adarika.
Muchuchisi Tanyaradza Gava vakaudza dare kuti nomusi wa4 Gunyana munguva dzemasikati, mapurisa eZimbabwe Republic Police echikamu chematikitivha eCriminal Investigations Department (CID) akanga ari kufamba achiita ongororo yavo munharaunda yeChitungwiza.
Vakabva vaita mahwekwe naPaulos achiputa mudzanga wembanje pamba pavo achibva autambidza kuna Churu anova akaputa uye ndokutambidzawo kune musungwa wechitatu, Nyamana.
Matikitivha aya akabva aenda pamba apa vachibva vazvizivisa kwavari kuti vainge vari vanaani uye mushure mezvo ndokubva dzatochena.
Vatatu ava vakatongerwa mhosva yekuputa zvinodhaka pasi pemutemo weSmoking of Dangerous Drugs as Defined in Section 175 (1) )b) of the Criminal Law Codification and Reform Act Chapter 9:23.
