Online Reporter
Kingstone Mapupu
MAPURISA eZimbabwe Republic Police (ZRP) ekuMidlands akazivisa nezvekusungwa kwevarume vana nokuda kwemhosva dzekuponda dzavari kupomerwa.
Inspector Emmanuel Mahoko, vanove mutauriri wemapurisa mudunhu reMidlands, vanoti varume ava vakasungwa mushure mekupondwa kwevanhu vaviri kuGokwe nekuMberengwa nomusi wa9 Chikunguru panguva imwe cheteyo.
Vanoti mushure memazuva mashoma mhosva idzi dzaparwa panzvimbo dzinoti Rangwe, kuMberengwa, neNyaurungwe, kuGokwe North, nenguva dza6 manheru, varume vana ava vakazosungwa.
“Vaviri vanoti Tatenda Zhou (24) naTinotenda Manake, vose vekwaSabhuku Vuta, kwaMambo Maziofa, kuMberengwa, vakasungwa nokuda kwemhosva yekuponda Tinotenda Dube (22) panzvimbo yemabhizimusi yeRangwe, avowo vaviri vanoti Gladman Gutu (28) naMunodawafa Francis (31) vakasungwa pamasowe vachitsvaga kubatsirwa nemuporofita kuti vasateverwe nengozi yemunhu wavakaponda, Willard Mupukuta (33),” vanodaro Insp Mahoko.
Insp Mahoko vanoti vanotenda zvikuru mushandirapamwe wevoruzhinji, vachidyidzana nemapurisa, mukuendesa mashoko ari kuita kuti vapari vemhosva vasungwe nekukasika.
“Zvakadai, nyaya dzekupondwa kwevanhu vaviri ava dziri kufambira mberi nekufeewa, kuchiitwa magwaro okuti varume vana ava nyaya yavo ipinde mudare guru reHigh Court munyaya yavari kupomerwa yekuponda,” vanodaro Insp Mahoko.
Vanoti vaviri vakaurayiwa vakaita zvekubaiwa nemapanga mushure mekutadza kuwirirana nokuda kwenyaya diki mumabhawa apo vainwa doro.
“Tinoramba tichikurudzira voruzhinji kuti vatsvage nzira dzekuyanana kana paita kusawirirana, votsvaga vamwewo vanovagadzirisa, pane kusvika pakurwisana, vopondana kana kukuvadzana,” vanodaro Insp Mahoko.
Vanoti mudunhu reMidlands muri kuwanda mhosva dzekupondwa kwevanhu, zvikuru mumabhawa nenzvimbo dzinocherwa goridhe nekumwe kunoungana vanhu, nokuda kwenyaya dzinogona kugadziriswa.
