Online Reporter
Bhekimpilo Tshalibe
ABABONA ngezempilakahle yezifuyo abe-Veterinary Services sebexwayise abalimi abafuyileyo ukuthi baqaphele izifuyo zabo zingahlaselwa ngumkhuhlane we-pulpy kidney ngoba wenza abalimi balahlekelwe yinzuzo yabo yomnotho.
UDokotela Maria Jakarasi ongu-Government Veterinary Officer esabelweni seMatabeleland North, ukhuthaze abalimi abafuyileyo ukuthi bananzelele izifuyo zabo ezigoqela imbuzi lezimvu zingahlaselwa ngumkhuhlane we-pulpy kidney.
Uthe umkhuhlane we-pulpy kidney uyingozi ngoba kawelapheki.
“Umkhuhlane we-pulpy kidney uyingozi ngoba kawelapheki. Uvame ukuhlasela imbuzi kanye lezimvu,” kutsho uDkt Jakarasi.
Kubikwa umkhuhlane lo ubangelwa ligcikwane elihlala phakathi kwamathumbu embuzi kumbe izimvu, elisuka limemetheke libe yitshefu nxa izifuyo lezi zingaguqulelwa ukudla ezandise ukukunikwa.
Uqhubekele phambili wathi umkhuhlane lo ulendlela obonakala ngayo kusifuyo esesigula.
“Umkhuhlane we-pulpy kidney ulendlela obonakala ngazo ezigoqela ukufa mahlayana, ukuwa, ukungadli, ukuhuda kanye lokuswela amandla, isifuyo sitshone ilanga lonke silele,” kutsho uDkt Jakarasi.
Uthe njengoba umkhuhlane lo ungelapheki, ukhuthaza abalimi ukuthi bewuvikele.
“Njengoba umkhuhlane lo ungelapheki, sikhuthaza abalimi ukuthi behlabise izifuyo zabo ijekiseni ye-pulpy kidney vaccine ukuze zingahlaselwa ngumkhuhlane lo.
“Sikhuthaza abalimi ukuthi bengabona ukuthi izifuyo zabo sezihlaselwe ngumkhuhlane lo bengazihlanganisi lezinye, ukuze zingathelelani,” kuphetha uDkt Jakarasi.
