admin
Ethel Ncube
ZIKHATHAZEKILE izakhamizi zakuWadi 5 eNtabazinduna kulandela ukuswelakala kwedamu endaweni yazo okubangela ukuthi izifuyo ziswele lapho ezinganatha khona okwenza zicine zihamba umango omude zidinga ukucitsha ukoma.
Iphephandaba likazulu libikelwe ukuthi abantu bayehluleka lokwenza ama-irrigation endaweni le ngenxa yokuswelakala kwedamu eliyilo elingabancedisa ukuthi bathole amanzi.
Intatheli ixhumane lesinye isakhamuzi sakule indawo uNkosazana Saziso Nyoni oveze ukuthi amanzi ayabakhathaza kakhulu.
“Amanzi aluhlupho kulindawo ngoba awezibholane engeneli. Esikucelayo yikuthi sigejelwe idamu ukwenzela ukuthi nxa izulu lisina angene khona agcinakale ukuze senelise ukuthola awokunatha kunye lawokuthelezela,” kulandisa uNkszn Nyoni.
Ekhuluma loMthunywa uMnumzana Godfrey Ngwenya uchaze ukuthi balodubo ngokuswelakala kwedamu.
“Izifuyo zethu zihamba umango omude zona zivele sezicuba zisiyadinga amanzi ingakho kungagejwa idamu eduze zingasizakala. Nxa izulu lisina thina siyaswela ukuthi amanzi siwagcine ngaphi ikanti nxa selikhona lingagcwala kuhle siyenelisa ukulima lokunathisa izifuyo zethu umnyaka uze uphele.
“Khathesi ngabe siyazilimela sikwazi ukuthi amanzi yithaphutshiye. Endaweni yethu akulalutho esingalwenza singelawo ukuthi sinathe ezibholaneni lazo kusuka kubenzima ngoba alakho ukuphela,” kutsho uNgwenya.
Intatheli ibuye yaxhumana lokhansila wakule indawo uMnumzana Bekithemba Qongo oveze ukuthi idamu liyadingakala.
“Sicela uHulumende asincedise ekugejweni kwedamu ukuze lathi sithuthuke senelise ukwenza amaphurojekithi atshiyeneyo endaweni yethu. Izifuyo ziyahawula kutshisa kunje zihamba umango omude zizama ukuyadinga amanzi ikanti nxa eseduze kuba lula,” kuphetha uKhansila uQongo.
Online Reporter