admin
YiNtatheli kaMthunywa
IMINCINTISWANO yokugijima yezikolo zeMatabeleland North ezaqhutshelwa eFolosi ngeviki elizayo, ikhangelelwe ukuthi ifundise abantwana ngokuqakatheka kokuvatshela indawo ezitshiyeneyo.
Kusukela ngoLwesibili mhlaka 3 kusiya kumhlaka 6 Mbimbitho, intshantshu zokugijima eziphuma kuzo zonke izigaba zeMatabeleland North zizakube zithe gwaqa esikolo seMosi oa Tunya kulumkhosi odibanisa izikolo ze-primary leze-secondary ngasikhathi sinye.
Inhlanganiso zabaphathi bezikolo ezeNational Association of Secondary Heads (Nash) le-National Association of Primary Heads (Naph) zikhethe ukuthi ziqoqe imincintiswano edolobheni leFolosi kuhloswe ukuthi kuthuthukiswe imidlalo lokuvakatshelana kulindawo.
Isikolo seMosi oa Tunya sesinxuse izigaba zeMat North kabili.
Kusenjalo, ifikile impahla yokugijima ezagqokwa yizigaba zonke kulumncintiswano. Impahla le ivela kusomabhizimusi uClemence Kunzekweguta umqondisi we-Zero Supplies.
Inkampani ye-Zero Supplies le ihlala incedisa izikolo kumidlalo yokugijima ngemva kokunanzelela udubo oluhlasele izikolo zakulindawo.
“Ngenxa yosekelo esiluthola kuzikolo zesabelo esikhulu seMatabeleland North kubhizimusi lethu, sikubone kufanele ukuthi lathi sisekele ezemidlalo. Ngokunjalo, kuliviki sizanikeza impahla yomdlalo wokugijima kuzo zonke izigaba eziyisikhombisa zeMat North,” kutsho iZero Supplies kumbiko wayo othunyelwe kuMthunywa.
Online Reporter