adminMthokozisi Dube
KULENDODA ebotshwe eHalale eMatopo kuyonale iviki ebibhadalisa izakhamizi izifuyo izenza inyanga ekhipha ondofa lenye impahla yobuthakathi.
UMthunywa uyakuveza ngokugcweleyo ukuthi “inyanga” le ebisaziwa ngokuthi nguSiziba kubikwa yafika kulesisigaba ingelasithupha loba nje ezinye incwadi eziveza ukuthi ingubani, owangaphi yaqala ukukhomba abantu ngobuthakathi andubana ibathathele izifuyo zabo.
Indoda le ibotshwe ndawonye lamanye amadoda amahlanu ebisebenza lawo.
UMthunywa ukhulume lenduna uMalaki Masuku oveze ukuba indoda le ibotshwe ngoLwesibili kuyonale iviki ngemva kokubikelwa kwamapholisa ukuthi uthatha izifuyo zezakhamizi.
“Silokhe sithithibele lapha kulandela ukubotshwa kwenye indoda eyafikela kimi lapha isithi ifuna ukuyabona uNdlovu eHalale. Ngikhuluma nje okhokhela inkamba yeMatopo usanda kusuka lapha,” kubika induna.
Induna ibike ukuba kwaba nzima ukuthi yalele indoda le ukungena esigabeni sayo ngoba wayedingwe nguNdlovu njalo inkolo zabantu zitshiyene.
“Kwabanzima ukuba ngixotshe lindoda noma nje yayingela sithupha esifakaza ukuba ingubani ngoba phela inkolo zabantu zehlukene,” kubika induna uMasuku.
Iphephandaba likazulu libikelwe ukuba lindoda ibotshwe labanye bayo ngoba bebesenza lokhu beyisithupha.
Kuzwakale njalo ukuthi indoda le ibisithi iyamisa omama abadinga inzalo ngokubahlamba ngezihlahla lakho okucine kubangela ukuba omkabo babikele induna mayelana lalesisiga ngoba bekusola lokhu.
“Lindoda ibihamba ikhipha izinto ezibalisa amasondo eziphaleni zabantu njalo mina ngangimuphe inyanga kuphela ukuba enze imithanathana yakhe njengalokhu wayebizwe nguNdlovu. Kodwa isimanga akukapheli lesikhathi engangimuphe sona, izakhamizi sezikhonona ngaye.
“Umthetho awungivumeli ukuba ngimxotshe njengoba wayebizwe ngumuntu funa wayelenhlupho zakhe emzini wakhe,” kubika induna uMalaki.
UMthunywa uzwe ukuba lindoda ibisiqede izifuyo zabantu izenza inyanga ekhipha ondofa lokunye okuhlupha izakhamizi.
Omele isikhulumi samapholisa esabelweni seMatabeleland South uAssistant Inspector Nkosilathi Sibanda ubike ukuba udaba lolu alukafiki endlebeni zakhe kodwa bazaluchwayisisa.
Online Reporter