admin
Thokozile Mbedzi
KULENINA ebelihlala eSilobela elithe ngemva kokufelwa lusana lwalo, lwaginya ilitshe lathatha isidumbu lasibeletha langena indlela liqonde kibo eGokwe.
UNkosazana Laureen Magreen oleminyaka engu-42 yokuzalwa wenze lokhu ngoba engelamali yokuqhatsha imota yokuthi imthwalele isidumbu sisiya kibo eGokwe. ULaureen uze wabonwa ngabantu akade besezitolo zeNkayi ebhabhule isidumbu ngoLwesibili mhlaka 18 Zibandlela ngezikhathi zantambama.
Kubikwa usane lukaLaureen, uKudakwashe Mpofu obelulenyanga ezine lugule lwafa eSilobela.
UMthunywa uzwe ukuthi usane lwedlule emhlabeni uLaureen lomkakhe uTafumaneyi Mpofu baluka icebo lokuthi babhabhule isidumbu baye kibo ngoba abaphathi balapho akade behlala khona bengavumi ukuthi kungcwatshwe abantu abavela kwezinye indawo esigabeni lesi.
Ekhuluma lentatheli kaMthunywa uNkosazana Jane Mazibuko uthe lokhe eqhuqha nxa angacabanga isibindi sikaLaureen.
“Lokhe ngididekile ngoba lokhu ngazalwayo kangikaze ngibone umama esiba lesibindi sokuthi esefelwe ngumntwana amthwale ahambe futhi umango omude.
“Umama lo kukhanya wagulelwa ngumntwana wafa abaphathi besigaba babakhomba indlela eya kibo ngoba eSilobela bebegcine umuzi. Bona bavela esigabeni seGoredema eGokwe,” kuchaza uNkszn Mazibuko.
“Kukhanya uMpofu nguye owalaya umkakhe ukuthi abelethe umntwana baye kibo. Ngokusweleka kwenhlanhla bathi sebeseNkayi abantu basola bebona umntwana egubuzelwe ngengubo njalo enganyikinyeki batshela amapholisa ukuba kulenina elilokhu linquma libhabhule umntwana kumbe limtshontshile.
“Amapholisa ambona bananzelela ukuthi umntwana ngowakhe kodwa wayesefile. Wachaza ukuthi basendleleni yokuya kibo eGokwe.
“Mhlawumbe aluba uLaureen wadinga uncedo kwabanye abesifazana khonale eSilobela kungenzeka ukuthi babengamncedisa kulokuthi ahambe ebelethe umntwana esethule.
“Lokhu uzaze azifele, ngeke wakukhohlwa ukudubeka okunje,” kulandisa uNkszn Mazibuko.
Isikhulumi samapholisa esabelweni seMatabeleland North uInspector Glory Banda ebuzwa ngodaba lolu uvumile wathi solufikile ewofisini yabo njalo uzulu okwakuqala kalandele imithetho yokuvinjwa kwabantu ezindlini ngenxa yeCovid-19.
“Udaba lwenina elibotshwe libelethe umntwana ofileyo solufikile ewofisini yethu ngakho uzulu okwakuqala kalandele imithetho ye-lockdown. Kabahlale ezindlini.
“Okwesibili nxa bethe bahlangana lohlupho kababikele amapholisa ngaso sonke isikhathi ukuze bathole ukwelulekwa ngendlela eqondileyo ukuze bangephuli umthetho,” kuphetha Insp Banda.
Online Reporter