admin
Nkosilathi Sibanda
UMDLALI wenguqu osephethwe emlonyeni kulezi insuku uLexington Mujokoro usetshiye iHighlanders ibambe phansi nanko usebalelwa emabhukwini eqembu eKaizer Chiefs kumbe Dynamos.
Lumdlali, oleminyaka yokuzalwa elitshumi lasitshiya galombili, ngumntaka Farai Mujokoro, owake wadla ubhedu kuTshilamoya ngensuku zakhe.
Kubikwa sekusele kancane ukuthi abeke ibizo lakhe kumaqembu womabili la ngokutsho kwabafakazi abaqotho abaseduzane laye. Iphephandaba likazulu liphethe udletshana lokuthi umdlali lo labaphathi bakhe abasuthiseki ngokuphawulwa liqembu leHighlanders, elaba ngelakuqala ukubika ukuthi liyamfuna.
Iqembu leFirst Mobile Sports Academy (FMSA) elakoBulawayo yilo elibambe lumdlali.
Abafakazi abaqotho bathe abacuphi beKaizer Chiefs lokhe beqinisa ukuthi uMujokoro ulendawo yakhe kulithimu loba nje kungaphumeli egcekeni ukuthi uzabizwa nini.
Ukuze iKaizer Chiefs ijike ilihlo kulumdlalo, yayimbone ngesikhathi edlalela ama-Young Warriors kumqhudelwano we-Cosafa Under 20.
“IDynamos yona ikhethe ukuthi ingaveli sobala ngokufuna kwayo lumdlali kodwa angeke kumangalise ukuthi kusiyaphela iviki elizayo, abalandeli benguqu bezwe ukuthi uselilunga laleliqembu,” kubika umfakazi owathulele uMthunywa udaba.
Umdlali lo uke walolonga leqembu leHighlanders, okwabayisitshengiselo sokuthi umqeqetshi uMandla Moyo uyamkhwabitha umdlali.
UMoyo uthe kuyisifiso sakhe ukuthi kube lomdlali olethalenta likaMujokoro eqenjini lakhe.
“Kuhle ukuba labadlali abasacathula njengaye eqenjini. Akulamqeqetshi ongekela umfana olesiphiwo njengaye.”
Kusenjalo, umdlali osezakhele udumo ku-Aston Villa, uMarvelius Nakamba kubikwa kasoke asuke kuleliqembu njengalokho obekukhulunywa kumaphephandaba.
Iwindi lokuthengiswa kwabadlali livaliwe ngokuqala kwaliviki kuligi yeEnglish Premiership, okutsho ukuba uNakamba kayindawo.
Umdlali lo ubebalelwa ukuthi uzakuya ku-Newcastle United kumbe ku-Crystal Palace.
Online Reporter