admin
UHULUMENDE usekhuthaze ababalisi ukuthi bahlatshwe ijekiseni yokuvikela iCovid 19 izikolo zingakavulwa.
Izikolo seziseduze ukuvulwa njalo zisiyavulwa ababalisi kumele babe sebehlatshiwe ukuze behlise amathuba okubamba igcikwane leCovid 19 eselibulele izinkulungwane zabantu kuleli.
Izikolo zavalwa mhlaka 4 Nhlangula njalo zazikhangelelwe ukuthi zivulwe mhlaka 28 Nhlangula kodwa kwehlula ngenxa yokumemetheka kobhubhane. UMongameli welizwe uKhomuredi Emmerson Mnangagwa kakamemezeli ukuthi izikolo zivulwa nini kodwa ugatsha lwezemfundo solubike ukuba izikolo sezilungele ukuvulwa.
Ekhuluma lentatheli oyisikhulumi sogatsha lwezemfundo yaphansi leyaphezulu uTaungana Ndoro uthe ababalisi kumele bahle bathathe lelithuba bayehlatshwa masinyane izikolo zingakavulwa.
Uthe umbiko ngalokhu okuzenzakala kulabo abangahlatshwanga uzamenyezelwa nxa ungalotshwa.
“Ugatsha luthanda ukukhuthaza ababalisi ukuthi bahambe bayehlatshwa ijekiseni yokuvikela iCovid 19 njengendlela yokuvikela kanye lokulawula igcikwane ezikolo zethu.
“Amajekiseni eCovid-19 aphephile kakhulu ebantwini abadala abatshiyeneyo kugoqela lalabo abaphila leminye nje imikhuhlane etshiyeneyo. Kungakho-ke sikhuthaza bonke ababalisi ukuthi bayehlatshwa ukuthi bazivikele, bavikele abafundi, imideni yabo kanye lomphakathi kubhubhane lolu,” utsho njalo.
Uthe ugatsha luphatheke ngokubona ukuthi izikolo zenza amalungiselelo ngendlela efaneleyo.
“Amalungiselelo ethu asesezingeni eliphezulu kungakho mhla uMongameli esivumela ukuthi sivule abantwabethu bazabuyela esikolo,” utsho njalo.
Uthe kulenhlanganiso ezinengi ezithize eziphathisa izikolo ngempahla yokuvikela iCovid 19.
Uthe ezinye ziphathisa ngama sanitiser kukanti ezinye zibona ngokuthi izikolo zithola amanzi.
Ikhabhinethi yathi zonke izisebenzi zikaHulumende kumele ziyehlatshwa ijekiseni le. Labo abangahlatshwanga kabasoze bathole umshuwalensi weCovid-19.
Online Reporter