admin
Ncekwenhle Ncube
AMAJAHA lezintombi afunda esikolo seMzila eKezi sehlanganise amakhanda aphuma lecebo elihle lokuthi baqoqe imali ukuze basize isikolo sakibo ngemfanelo zabantwana zokufunda.
IMzila Primary Ex-Students Association eyasungulwa zinjiva zeKezi ngoMfumfu nyakenye isikhethe ukuncedisana lezakhamizi zakule indawo ukusiza abantwana besikolo seMzila Primary School ukuthola imfundo elohlonzi.
Ekhulumisana lentatheli uMnumzana Bhekizenzo Ncube uchaze ukuthi njengenhlanganiso sebethengele isikolo seMzila impahla ebalisela ikhompuyutha, i-solar panel, i-battery kanye le-invetor.
Impahla le kubikwa izancedisa ihofisi yesikolo nxa kubhalwa njengoba isimo sisiya siguquka njalo sidinga impahla le.
“Isikolo sisithengele ikhompuyutha eyodwa kanye lemfanelo yakhona edingakalayo ukuthi isebenze. Njengabafundi abadlula lapha kuyisifiso sethu ukuthi ihofisi yesikolo sethu izuze imfanelo ukuze abantwana bephumelele ezifundweni zabo,” kuchaza uMnu Ncube.
Iphephandaba likazulu lizwe ukuthi inhlanganiso le ilungiselela ukuthengela isikolo lesi imvunulo yabafana lamankazana eyokugqoka nxa bedlala ibhola.
UMgcinisihlalo wenhlanganiso le uMnumzana Prosper Dida Ncube uthe imali yemvunulo yokudlalisa ibhola siqoqiwe sebelinde ukuthi ithengwe ihanjiswe esikolo.
“Sesiqoqe imali yokuthenga izigqoko zokudlalisa ibhola ezigoqela ezabafana lamankazana, besisabanjwe yikuthi isikolo sidinga umhlobo onjani. Lokhu sithemba kuzanika abantwana idlabuzane lokuthi banqobe kumidlalo yabo nxa bedibana lezinye izikolo,” kutsho uMnu Ncube.
Online Reporter