adminLeonard Ncube
KULANDELA isiga esenzakele eSizinda, eVictoria Falls ngenyanga ephelileyo lapho okulosobhuku obanjwe xhaka ezitika ngomfazi wesinye isakhamuzi, izakhamizi zakulindawo sezizibuza ukuthi kungaba khona umoya osungene inkokheli zomdabu ngoba sebethathu osobhuku asebemiswe umsebenzi ngendlela efanayo.
Izakhamizi zilokhu zibuzana ukuthi ngumoya bani lo, nanko phela sebebathathu osobhuku asebebanjwe xhaka bencinda uluju lwemvelo labafazi babanikazi kuminyaka emithathu edlulileyo.
Ethonisisa icala likaMnumzana Felix Dube, yena othathelwe ubusobhuku kulandela ukubanjwa kwakhe elomfazi kaMnumzana Everson Tshuma, uMlisa Enock Ndlovu Marathuza, utshele izakhamizi ukuthi ulokukhathazeka ngoba osobhuku bakhe bayaganga.
“Akaqali uDube ukukwenza lokhu njalo useke wabizwa kulinkundla wala ukuza.
Okudanisayo yikuthi ngowesithathu usobhuku osebanjwe ngendlela efanayo.
Kulusizi ukuthi abakhokheli okumele babe yimithunzi yabantu yibo asebeganga.
Loludaba lusitshengisa indlela inkokheli zomdabu esezisebenza ngayo,” kutsho umlisa uMarathuza.
UMnu Dube wahlawuliswa ithokazi lenkomo elilodwa kumbe i$500 ngemva kokutholakala elecala lokufohlela emzini kaMnu Tshuma.
Inkudla yabuya njalo yamkhuza uMnu Dube ngokudelela abatshutshisa lawo wonke umthethwandaba kamlisa uMarathuza, andubana imhlubule izembatho zobusobhuku.
UNkosikazi Sophia Ncube nguye osaphethe ubusobhuku balesisigaba kungakakhethwa omunye.
Iphephandaba likazulu libuye layilandelisisa lindaba lafumana ukuthi osobhuku ababili abamiswayo nguMnu Smart Ncube, owayengumlisa eSidobe loMnu Dumezweni Ngwenya yena owayegusobhuku eNtabayengwe, eSizinda.
UMnu Ngwenya kasekho ubhubhe nyakenye.
Izakhamizi zeSizinda zithi zilokujabula ngokumiswa umsebenzi kukaMnu Dube nanko phela zimethesa umlandu wokubusa ngodlame langobugwevu.
Kubikwa uMnu Dube ubekade ethengisela abantu abangasibo bakulesi isigaba izitanda kungela kuxoxisana labalandeli bakhe.
Abanye njalo ngabathi ubesejwayele ukukhombisa lokuzincinda ngabafazi babanikazi.
UMnu Dube ukulandule konke lokhu ethi akala bantu osethe wabanika umhlabathi.
Online Reporter