admin
Cornelius Luphahla
MHLAKA 2 Mpandula abaculi bezokholo bazanyikinya inkundla yeHillbrow Theater kweleSouth Africa lapho abazajabulisa abalandeli bomculo lo kuZidafo Gospel Festival.
Umkhosi lo kubikwa uzaqala ngehola lesithupha ntambama kuze kuyelamula ukuphuma kwelanga.
IZidafo (Zimbabweans in Diaspora Artist Forum) yinhlanganiso yabahlabeleli bengoma zokholo ehlose ukubathuthukisa.
UNombeko Khahlela ongomunye wabaculi abazavuthisa inkundla uxoxisane loMthunywa waveza ukuthi emkhosini lo kuzabe kulabaculi bezokholo abanengi kakhulu njalo bakhuthaza uzulu ukuthi abuye azozibonela ukudla kwamehlo.
“Emkhosini lo kuzabe kulabaculi bezokholo abangu-30 njalo bonke ngabadabuka kwelakithi koMthwakazi.
Kungakho-ke sinxusa uzulu wonke jikelele ukuthi abuye azozibonela ukudla kwamehlo engezwa ngendaba.
“Ekusunguleni kwethu umkhosi lo sijonge ukuvezela uzulu ukuthi lakithi koMthwakazi bakhona abaculi abalamathalenta kwezomculo.
“Umkhosi lo sikhangelele ukuthi yiwo ozaphakamisa umculo wezokholo ubesezingeni eliphezulu,” kutsho uKhahlela.
Omunye wabaholi beqembu leBatembezeli Gospel elizabe likhona kulo umkhosi uNothando uveze ukuthi umkhosi lo ngowokuqala ukwenziwa kweleSouth Africa lokhe baqala ukucula njalo bathembisa uzulu uluju kuphela.
“Umkhosi lo ngowakuqala kweleSouth Africa njalo sikhangelele ukuthi nxa sisuka lapha siyekwenza njalo umkhosi ofana lalo kwelakithi. Lokhu sikwenzela ukuthi sivezele njalo abantu bakithi ukuthi umculo wezokholo usasekhona kithi njalo lathi sibambene noma sicula siphetsheya kwelizwe.
“Ngokwenza umkhosi lo kuleli sikhangelele ukuthi abalesifiso sokuphakama kwezomculo babone ukuthi ithuba likhona njalo ukubambana, yikho okungabathuthukisa kwezomculo,” kuchaza uNothando.
Ekhuluma loMthunywa uTobias Zitha umholi weqembu leNdumiso Gospel Choir uchaze ukuthi ukhuthaza abaculi bonke bakuleli ukuthi babambane kungakhathalekile ukuthi bacula wuphi umculo.
“Njengenhlanganiso sikhuthaza abaculi bonke ukuthi babambane njalo babuye bezojabula lathi kungakhathalekile ukuthi bacula wuphi umculo. Lokhu kuzabanceda ikakhulu ekuboneni ukuqakatheka kokubambana kwezomculo.
“Sikhuthaza abaculi ukuthi sincedisane ekuthuthukiseni ezomculo kwelakithi ukuze abantu bangaze bakhangelela phansi abaculi njalo babancedise ukuthuthuka,” kuphetha uZitha.
Online Reporter