Idla amahabula iMlambos Express Band

LIZE lazo njalo iphephandaba likazulu kule iviki kwezokujabulisa uzulu nanko phela liphethe ijaha elingena kuvungame uzulu. Iqembu leli elihlanyisa uzulu kungaba yiliphi ngaphandle kweMlambos le eyaziwa ngezindaba zayo zokuphakululela uzulu uluju kuphela.

Kungaba ngubani kambe ohola leliqembu ngaphandle kukaFiselani Ngwenya odume ngokuthi nguSaMaNgwe.

Funda ukholise ingxoxo enambithekayo phakathi komculi lo, uFiselani Ngwenya (FN) lentatheli yephephandaba likazulu uCornelius Luphahla (CL).

CL: Akuthi fahlafahla mayelana lembali yakho Sitshela kanye leyeqembu leMlambos?

FN: Mina ngazalelwa esigabeni seLuvuluma ePlumtree ngabuya njalo ngakhulela khona. Ngomnyaka ka1988 ngayafunda uGiredi 1 eKungubo Primary School ngaze ngaqeda ngo1994 uGiredi 7.

Ngaqhubekela phambili ngezifundo zami ngaya kuFomu 1 ngo1995 ngaze ngayaqeda uFomu 4 ngo1998.

Ngemva kwalokho ngasuka kweleZimbabwe ngayadinga umsebenzi eSouth Africa.

Ezokucula ngaziqala ngisafunda e-primary lapho engangitshaya khona amakatali ngiwenza ngezigubhu zamafutha esitshebo.

Ngaqhubeka ngitshaya amakatali la ngihlabela lengoma zabanye abaculi noma nje ngangingakaziwa emphakathini.

Ngathi sengiseSouth Africa ngahlangana lomnewethu esafika saqala ukuhlabela-ke ingoma ezicacayo.

CL: Landise ukutshayela ngaphi ingoma zenu njengeqembu leMlambos jahelibanzi?

FN: Ingoma zethu sandise ukuzitshayela endaweni ezehlukeneyo ezigoqela kuma-shows khonapha eSouth Africa kuthi nxa sikwelakithi koMthwakazi sandise ukutshaya ingoma zethu endaweni ezigoqela eLupane, Nkayi, Tsholotsho, Plumtree, Bulawayo kanye lakwezinye indawo ezehlukeneyo.

Khathesi sibizwe kweleBotswana ngakho sikhangelele ukuyatshaya khona.

Kwesinye isikhathi siyake sibizwe emikhosini etshiyeneyo efana lemitshadweni, emadilini okuzalwa kanye lakweminye imidlalo  eminenginengi.

CL: Akutsho mfokaNgwenya ukuthi licula libangaki njalo selakhipha amadlalade amangaki njengeMlambos?

FN: Eqenjini lethu sicula singamalunga angu-14 njalo lokhe saqala ukucula sesakhipha amadlalade angu-12 lamaDVD amabili.

Idlalade lakuqala salikhipha ngo2002 kuthi elokucina silikhiphe ngo2015.

Ama DVD esesawakhiphayo agoqela elika2011 elithi Jabula Ujule lelika 2014 elithi Sidlal’ unyawo.

CL: Abantu bathini ngengoma zenu njengeqembu labaculi njalo likhangelele ukwenzelani uzulu lonyaka?

FN: Abantu bayawujabulela kakhulu umculo wethu njalo basikhuthaza ukuthi siqhubekele phambili sicula singaze sadela.

Okunye njalo basikhuthaza ukuthi sibenzele ama-shows                                                                         amanengi sibakhiphele lama-DVD ukuze basibone.

Ngalokhu sikhangelele ukukhiphela uzulu imbabazane yedlalade lonyaka ukuze azithokozise njalo.

Okunye sikhangelele ukukhipha iDVD ukuze abantu bazibonele ngamehlo sibajabulisa njengokufisa kwabo.

CL: Lokhe laqala ukucula bunzima bani eliyake lihlangane labo kwezokucula?

FN: Kwezokucula ubunzima esiyake sihlangane labo yikuthi abantu bayasitshontshela umculo wethu, ikakhulu ama DVD.

Lokhu kusenza singathuthuki masinyane ngoba basuka bawuthengise ngentengo ephansi kakhulu okwenza ukuthi abantu bengasathengi kithi.

Okunye njalo sikhathazwa yimali yokukhipha ama DVD njengoba nje abantu abanengi besicela ukuba sibakhiphele wona.

CL: Nkuthazo bani oyipha abaculi abasacathula mfokaNgwenya njengoba suke wadlula ekucathuleni lawe?

FN: Kubaculi abasasungula ngikhuthaza ukuthi bengaze badela ukucula kabasebenzise iziphiwo zabo ngendlela eqondileyo.

Okunye njalo ngibakhuthaza ukuthi bengaze bahlabela ngenxa yokuthi befuna imali kodwa kabahlabele ngenxa yokuthi kuyizipho zabo ukuhlabela.