admin
Ncekwenhle Ncube
IZIKOLO zonke ezingaphansi kwesigaba seMatobo bezithe gwaqa izolo esikolo seSt Sebastian Secondary eKezi zisamukeliswa izicoco kanye lemendulo zabafundi, ababalisi kanye lezikolo ezisebenze gadalala nyakenye kumkhosi wamaDistrict Merit Awards.
Umkhosi lo uqhutshwa ngemva kokusebenza ndawonye kwenkokheli zezikolo ezibona ngentuthuko ezikolo (School Development Committees) ndawonye labazali ngenhloso yokukhuthaza abantwana kanye lababalisi ukuthi basebenze nzima.
Ekhuluma lephephandaba likazulu uMphathisikolo weSt Sebastian uMnumzana John Bango uchaze ukuthi banike abafundi abaphume lemiklomelo emihle imvuzo njalo lesikolo esenze kuhle laso besiphiwa umvuzo.
“Umfundi obenze kuhle ezifundweni zakhe besimnika umvuzo kanti njalo lesikolo esenze kuhle sithole umvuzo waso.
“Lokhu kuzenza abafundi kanye lezikolo zibe lomoya wokuncintisa okuzathi ekupheleni komnyaka sibe labantwana abanengi abazenza kuhle esigabeni,” kuchaza uMnu Bango.
Umkhosi lo uqale ngombukiso wemisebenzi yabafundi yezandla kanye leyesayensi.
“Injongo yalokhu yikuthi sikhuthaze abafundi abaleminwe ukuthi baqhubeke belolonga iziphiwo zabo ngoba zingabasiza kusasa,” kulandisa uMnu Bango.
Abafundi abenze kuhle njalo kwezemidlalo labo baphiwe imendulo. “Inengi labafundi esibaphe imendulo yilabo abafika kubanga lokuncintisa lentshantshu ezivela kumagumbi amane akuleli.
UMnu Bango uphethe ngokuthi enye inhloso yomkhosi lo yikuthi ababalisi bazuze ithuba lokuthi babelane imicijo lamaqhinga abangawasebenzisa ukuqeqetshisa abafundi.
Online Reporter