admin
Johas Moyo
ABALIMI bakhuthazwa ukuthi benze izibaya zezigodo yinhlanganiso yeLivestock Production Department ukuze izifuyo zingabulawa ngumqando.
ULivestock Production Officer uMnumzana Mike Nemashakwe ubikele iphephandaba likazulu ukuthi isibaya esenziwe ngesigodo senza izifuyo zikhudumale ngoba umquba uyabe uvalelwe phakathi kulanxa isibaya senziwe ngocingo.
Uthe izifuyo lazo ziyahlaselwa yimikhuhlane ngesikhathi somqando kungakho kubalulekile ukuthi abalimi bazivikele emqandweni.
“Izifuyo ezifana lenkomo ngesikhathi somqando zandise ukuhlaselwa ngumkhuhlane wesihlabo lazo njengabantu.
“Kungakho-ke sikhuthaza abalimi ukuthi benze izibaya zabo ngezigodo, ziyavimba umoya ukuze izifuyo zingangenwa ngumqando lo okhona,” kutsho uMnu Nemashakwe.
Uqhubekele phambili wathi izifuyo zingagodola ziyafa.
“Izifuyo zingagodola ikakhulu amathole, amazinyane, ingulube, kanye lezimvu kuyaphangisa ukufa. Ngokunjalo abalimi kumele babone ukuthi bayalungisa izibaya zabo ngaphansi bafake utshani ukwenzela ukuthi umqando ovela phansi ungagulisi kumbe ungabulali izifuyo.
“Izibaya zingenziwa ngezigodo ziyavimba umoya ukuthi ungangeni esibayeni,” kutsho uMnu Nemashakwe.
Uthe isibaya sezigodo senza umquba ubanjwe ungaphephuki ngokunjalo umquba lowo uqakathekile ngoba wenza uzifuyo zihlale zikhudumala ngaso sonke isikhathi.
“Akumelanga kube lezifuyo ezifayo ikakhulu ezincane ngoba abalimi abafelwa yizifuyo ezincane kutsho ukuthi umnyaka ozayo abanye sebethengisa izifuyo zabo bona bayabe bengelazo,” kutsho uMnu Nemashakwe.
Uphethe ngokukhuthaza abalimi bonke ukuthi badoze izifuyo zabo ngemithi eyehlukeneyo egoqela eyesilungu kanye leyesintu ukuze kwenqatshelwe leyo mikhuhlane etholakala ngalesi isikhathi somqando.
Uthe abalimi kumele badingele izifuyo zabo ukudla ukuze imithi isebenze kuhle njalo nxa kuqanda izifuyo zidla kakhulu ngoba zisebenzisa amandla amanengi.
Online Reporter