admin
Buhlebenkosi Gaule
INHLANGANISO zabalimi sezisole abanye abanikazi bezilaha ngokuthenga izifuyo zabo ngemali engatsho lutho ngenxa yokuthi akulamthetho ovikela abalimi kubuqili lobu.
Kubikwa abanikazi bezilaha lezi bathenga izifuyo kubalimi ngemali engatsho lutho kuthi nxa sebezithengisa bazithengise ngemali ephezulu kakhulu kulale abayabe bethenge ngayo.
Lokhu kuvele ngoLwesibili emhlanganweni wabalimi obekhona eGwanda.
Ugatsha lweMechanisation and Irrigation Development selwamukele imbiko yokuthi kulabanikazi bezilaha abasebenza ngendlela engaqondanga nanko phela bathenga bethengisa izifuyo ngesitsotsi.
UMnumzana Donald Khumalo ongomunye wabalimi njalo owake waba ngumkhokheli weZimbabwe Commercial Farmers Union uthe konke lokhu kuliqiniso njalo abalimi basebunzimeni.
“Sihlala sikhalaza njengabalimi ukuba abathenga izifuyo zethu yiboabafuna ukutsho ukuba sizithengise ngemalini kulokuthi thina abanikazi siziqambele imali esiyifunayo.
“Ngenxa yokuthi abalimi bayabe befuna ukuba izifuyo zabo zithengwe bayathula nje izifuyo zabo zisehliswa intengo yazo,” kutsho uMnu Khumalo.
Kuzwakale njalo ukuba sekube lesicelo esivela kubalimi sokuba kube lomthetho olawula ukuthengiswa kwenkomo kusiya ngesisindo sayo kanye lokuthi ingumhlobo wuphi njengasemazweni afana leSouth Africa leNamibia.
Ngakolunye uhlangothi uNkosikazi Irene Maphenduka ucele ukuba omama abakubhuzimusi yokuthengiswa kwenkomo bavunyelwe ukuba bathengise inkomo zabo lapha abafuna khona njalo labo baphathwe njengabantu abakubhizimusi yenkomo ngoba inengi labantu abangomama yibo abakhangele izimuli zabo.
Online Reporter