Online Reporter
YiNtatheli kaMthunywa
ABALIMI sebekhuthazwe ukuthi bakhethe izilimo, isikhathi sokuhlanyela kanye lendlela zokulima beqondiswa yisimo somumo womkhathi kanye lezulu elikhangelelwe ukuna njengoba amalungiselelo esigaba sokulima sika-2026/27 eseqalisile.
Abalimi bacetshiswa ukuthi bekele ukulandela isimo sezulu seminyakeni edluleyo kodwa basebenzise ulwazi abaluthola kulabo ababona ngezomkhathi.
UMgcinisihlalo we-SGR 200ha+ Club Zimbabwe, uTichaona Mapfoche, uthe ukuntshintsha kwesimo somkhathi kudinga ukuthi abalimi labo baguqule indlela ababehlela babuye baphathe ngayo ezokulima eminyakeni eyedluleyo.
Uthe abalimi kumele bakhethe izilimo ezifaneleyo, bahlanyele ngesikhathi esifaneleyo njalo basebenzise izindlela zokulima lokugcina ubumanzi ezifanele indawo abahlala kuyo.
“Lokhu kutsho ukuthi kumele ube lesilimo esifaneleyo, endaweni efaneleyo, ngesikhathi esifaneleyo, kusetshenziswa indlela efaneleyo yokulima kanye leyokulondoloza ubumanzi.”
Ukhuthaze abalimi ukuthi balungise amasimu kuselesikhathi, balondoloze amanzi, banakekele umhlabathi, basebenzise ubuchwepheshe obufaneleyo njalo bathelezele kakhulu.
Uqhubekele phambili esithi kuyadingeka njalo ukuthi balalele izixwayiso zesimo sezulu njalo bafundisane.
Ukhuthaze abalimi ukuthi basebenzisane labalimisi ukuze bathole ulwazi lwendawo abakizo ukuze babaqondise ekukhetheni izilimo kanye lokuthi bababele amacebo okulima.
“Wonke amathonsi amanzi aqakathekile,” kutsho uMnu uMapfoche.
Ukhuthaze iziphathamandla zezifuyo lezokulima kanye labalimi ukuthi basebenzise ulwazi lwesayensi ekwenzeni amacebo okukhuphula isivuno.
“Nxa ababona ngezomumo womkhathi abeMeteorological Services besithi umkhathi lo uzakuba nzima, kufanele silungiselele ukuthi siqhubeke sithola ukudla, siphilise imuli zethu njalo sigcine lemisebenzi ehambelana lokulima.”
Inkuthazo yokuthi amalungiselelo abalimi kumele aqondiswe lulwazi lwesimo sezulu iza ngesikhathi iZimbabwe ilungiselela isigaba sokulima sika-2026/27.
