Online Reporter
Nkosilathi Sibanda
I-ZIMBABWE Football Association (Zifa) isibhoboke okwakuqala ngokufa komlandeli webhola owedlula emhlabeni ngesikhathi amaWarriors edibana leDemocratic Republic of Congo (DRC) emdlalweni wokukhankasela ukungena kuqhudelwano we-Afcon 2027, eNational Sports Stadium ngoMvulo.
Isehlakalo lesi senzakale kuGate 2 ngesikhathi inkulungwane zabalandeli bezama ukungena enkundleni ukuyabukela umdlalo weGroup E, lapho iZimbabwe eyacina isehlulwa nge 2-1.
Imbiko ephumileyo ithi isehlakalo lesi sasithinta lemota yeZimbabwe Republic Police (ZRP), lanxa isimo esabangela ukufa komlandeli lo singakacaci.
Kumbiko wayo, iZifa yethule amazwi enduduzo kumuli yomlandeli owedlula emhlabeni, njalo yafisela abalandeli abalimalayo ukuthi basile.
“IZimbabwe Football Association (Zifa) idabukile ngokufa komlandeli kulandela isehlakalo esenzakala eNational Sports Stadium ngesikhathi somdlalo weZimbabwe leDemocratic Republic of Congo ngoMvulo, mhlaka 28 Mpandula 2026.
“Ikhomithi yabakhokheli, abadlali, iqula labaqeqetshi lomdeni wonke webhola, ngokuzehlisa okukhulu sithi dudu kumuli, labangane bomufi. Sifisela njalo bonke abalandeli abalimalayo ukuthi baphole ngokuphangisa,” kutsho iZifa.
Inhlanganiso le ithe isebenza ndawonye labanye abathintekayo lamapholisa ukuze kutholakale ukuthi kwenzakalani ku-Gate 2.
“IZifa isebenza labo bonke abathintekayo leZimbabwe Republic Police (ZRP) ukuze kutholakale izizatho zesehlakalo esenzakale ku-Gate 2 njalo kulungiswe izikhalazo eziphathelane lokuvikeleka.
Inhlanganiso izasekela wonke amanyathelo omthetho,” kutsho umbiko walinhlanganiso ephethe umdlalo wenguqu kuleli.
IZifa iphinde yathi ukuphepha kwabantu bonke abangena emidlalweni kuqakathekile.
“Ukuphepha kwabantu bonke abaya emidlalweni yebhola kuhlala kusemqoka kithi. IZifa isebenzisana leziphathimandla ezifaneleyo labaphathi benkundla ukuze kuqiniswe amanyathelo okuvikela bonke abaya emidlalweni,” kutsho linhlanganiso.
