Online Reporter
YiNtatheli kaMthunywa
IZULU elinengi ebelikhangelelwe ukuna elizweni lonke kusukela ngoLwesibili kusiya kuLwesine lingaletha ingozi kanye lamathuba kubalimi njengoba isikhathi sokulima sesisondele, kutsho ingcitshi kwezokulima uMnumzana Ivan Craig.
UMnu Craig uxwayise abalimi ukuthi baqinisekise ukuthi balendawo ephephileyo yokugcina izifuyo nxa izulu lisina.
“Qinisekisani ukuthi lilendawo ephephileyo yokufaka zonke izifuyo zenu, kungaba yimbuzi, izimvu, obabhemi kumbe inkomo. Izihlahla ezinde zikhanga umbane, ngakho izifuyo kumele zigcinwe khatshana lazo,” kutsho uMnu Craig.
Uphinde waxwayisa abantu ukuthi nxa becatshela izulu kunye lombane bangacatshi ngaphansi kwezihlahla kodwa bangene ezindlini kumbe ezakhiweni eziphephileyo.
UMnu Craig uthe abalimi nxa kungenzeka ukuthi imbhida yabo iphanjaniswe amahlamvu yisiqhotho bangawakha bawomise babe sebewuthengisa usuwomile.
“Le yindlela yokwengeza inzuzo yabo kulokho abalakho.”
Uthe izulu leli liphinde linike abalimi ithuba lokuqalisa ukulungisa amasimu ngoba umhlabathi usumanzi njalo sekuzakwehlisa lendleko zokulima.
“Abalimi abacabanga ukuthi ukugebha amagodi eNtwasa/ Pfumvudza kunzima, ikakhulu emasimini amatsha, sebelethuba lokwenza lokhu ngoba umhlabathi uthambile, okuzakwenza kube lula ukulungisa amagodi okuhlanyela,” kutsho uMnu Craig.
UMnu Craig uthe izulu lizaphinda lincedise ukwehlisa imlilo yeganga, lengeze amanzi emadamu lemifuleni, njalo likhulise utshani bezifuyo.
Lanxa kunjalo, uxwayise abalimi ukuthi basebenzise amanzi amayo ukuze kwehliswe amathuba okwanda kwemiyane lempukane ezingabangela imikhuhlane ebantwini lasezifuyweni.
“Ngibona izulu leli liletha inzuzo enkulu kubalimi lakuzwe lonke njengoba silungiselela isikhathi sokulima. Kumele silamukele njalo sisebenzise wonke amathuba elisinika wona ukuze kusincede,” kuphetha uMnu Craig.
