Online Reporter
YiNtatheli kaMthunywa
INHLANGANISO ekhangela ngezokulima i-Agritex ikhuthaza abalimi ukuthi basebenzisane labakhangela ngezomumo womkhathi ekuhleleni ngezilimo abangazilima kanye lekuzinakekeleni.
Ekhuluma lephephandaba likazulu uNkosazana Sithandazile Mpofu ongumlimisi kunhlanganiso le, uthe abalimi kumele basebenzisane labezomkhathi abeMeteorological Services ukuze balime izilimo ezihambelana lomumo womkhathi kanye lekuzinakakaleni zize zivuthwe.
“Abalimi bavame ukuthenga inhlanyelo yomumbu kuphela nxa belungiselela isikhathi sokulima kodwa njengenhlanganiso sikhuthaza abalimi ukuthi basebenzelane labakhangela ngomumo womkhathi ukuze babekwazi ukuthi izulu lizakuba linengi okunganani, yiziphi izilimo ezizavuthwa kuhle njalo ngemva kwesikhathi esinganani.
“Abalimi bangasebenzisana lababona ngezomumo womkhathi kubalula ukuthi bazi izilimo ezizakwenza kuhle esigabeni abakuso nxa kukhangelwa lezulu elikhangelelwe ukuna kuleyondawo,” kuchaza uNkszn Mpofu.
Uqhubekele phambili wathi ngokusebenzisana labomkhathi abalimi balakho futhi ukwazi ukuthi izifuyo zabo bazihlalise endaweni ezinjani kanye lokuzidingela ukudla okuqondileyo okuhambelana lokudla okuyabe kukhona ngaleso sikhathi.
“Abalimi nxa bengasebenzisana labomkhathi bengaba kwazi isimo somkhathi sezulu baphinde babekwazi okuzayo emavikini alandelayo okuyinto enhle ngoba kuyabaphathisa ekuhleleni kwabo ukuthi bazavikela njani izifuyo zabo.
“Ngokubambisana lababoba ngezomkhathi abalimi kuyabancedisa ekuvikeleni ukudla kwezifuyo ngoba kuyabancedisa ukuthi bakugcine kuhlanzekile njalo kungahlangani lengcekeza ngoba kungabangela imikhuhlane ezifuyweni.
