Online Reporter
ISIBONGO lezangelo kungasungula ingxoxo, kwakhe ubudlelwano phakathi kwabantu abangazaniyo.
Lokhu ngokunye okuzabe kusenzakala kumcimbi weMutupo Festival ozahlanganisa abantu beZimbabwe ekuthakazeleleni imvelaphi yabo ngomculo, inganekwane lokunye okuveza imvelaphi yethu.
Umkhosi lo, uzaqhutshwa mhlaka 3 Mfumfu eSherwood Golf Club eMabelreign, eHarare, njalo uzabe ulengcitshi zomculo ezigoqela Gift Amuli, Kurai Makore, Baba Harare loMbeu. Umculi uDereck Mpofu nguye ozabe ephethe uhlelo.
Abanye abaculi abakhangelelwe ukungena esitikini nguCynthia Mare, Pah Chihera, Obert Chari, Tryson Chimbetu, Josh Meck loProgress Chipfumo.
Uhlelo lolu alucini emculweni walamuhla kuphela, kodwa luzahlanganisa lokudlalwa komculo wesiNtu lokwethiwa kwezinganekwane.
IKuwadzana KweVaripasi Mbira Group, iMbare Chimurenga Choir, Ganya Up Dance Ensemble lomethi wezinganekwane uSekuru Gora ngabanye balabo abazabe bephatheka.
Abaqoqi bathe abaculi labanye abazabe bekhona bazasebenzisa izindlela ezehlukeneyo ukwethula imvelaphi yethu, lamasiko ukuze kudluliselwe kuzizukulwane.
INyaradzo Group, esekela umkhosi lo, ithe ukusekela kwayo kuhambelana lombono wokulondoloza amasiko kanye lezimiso zobuntu, ukunakekela abantu, isithunzi lobudlelwano bomphakathi.
“Izangelo zethu zingaphezu kokuba ngamabizo. Zithwele amazwi abokhokho bethu, isithunzi semuli zethu kanye lendaba ezisitshela ukuthi singobani,” kutsho Tendayi Gwatiringa, oweNyaradzo Head of Strategic solutions and corporate affairs.
Umkhosi lo uphinde uveze indima engadlalwa ngamabhizimusi ekugcineni amasiko eZimbabwe ephila.
Abaculi, abetha izinganekwane labalondoloza amasiko badinga indawo abangaveza khona umsebenzi wabo, kuthi izizukulwane ezisakhula zithole amathuba okufunda lokuqonda imvelaphi yazo.
“Amasiko kumele alondolozwe angabi sengqondweni nje kuphela. Adinga inkundla, ukusekelwa lengatsha ezizimisele ukusekela ngemali,” kutsho uGwatiringa.
INyaradzo Group ithe ukusekela kwayo umkhosi lo kuyindlela yokuvula inkundla lapho abantwana abangafunda khona ngemvelaphi yabo, kuthi abantu beZimbabwe bathole ithuba lokuphinda baxhumane lemvelaphi yabo.
Abazabe besemcimbini bakhuthazwa ukuthi babe yingxenye yokutshengisa amasiko ngokugqoka impahla zesiNtu kanye lokuthi “bagqoke impahla eziveza izibongo zabo”.
Lokhu kuzakwenza ukuthi ukutshengiswa kwamasiko kungacini esitikini kuphela kodwa kube yingxenye yomcimbi wonke.
Okusemqoka emkhosini lo yikuthi amasiko abonakale nxa abantu behlangana ukuze bawadlulisele phambili.
Blessing Chizhande