admin
Thokozile Mbedzi
KUBELENKEMENKEME esigabeni seMpisini eSigodini ngoLwesihlanu ngeviki ephelileyo lapho amadoda angu-11 ahlasele abulala enye indoda ngezikhali ezitshiyeneyo.
Kubikwa uMandlenkosi Dube oleminyaka engu-20 utshaywe walimala ngezinduku, amabhemba lamahloka wasala ebangwa lezibi, ngamadoda ayenatha lawo utshwala kulandela ukungazwisisani.
Abetheswacala ababalisela uWellington Sibanda (28), Lungile Ndlamini (24), Mzingaye Sibanda (28), Prosper Ncube (27), Moreblessing Sibanda (24), Blessed Sibanda (21), Emmanuel Sithole (27), Lameck Sibanda (23), Honest Mhlanga (23), Talent Sibanda (22) loMqondisi Nyoni akungasatholakalanga iminyaka yakhe lokhu besadingwa ngamapholisa.
Omunye wezakhamizi uMnumzana Thembani Mafu ekhuluma lentatheli uveze ukuthi lokhe wathwetshulwa yingwe kakaze asibone isihluku sokuthi amadoda angu-11 ayathelela umuntu oyedwa ngezikhali ezehlukeneyo engabiseli.
“Kangikaze ngizwe kuthiwa kulomuntu ongahlaselwa ngabantu abangu-11 yena eyedwa ngoba kube lokungazwisisani etshwaleni. Umfanyana lowana wabulawa njengenyoka engene endlini bemgongoda abanye bemhlahlela ngamabhemba kanye lamahloka,” kutsho uMafu.
Isikhulumi samapholisa esabelweni seMatabeleland South uChief Inspector Philisani Ndebele ebuzwa ngodaba lolu uvumile wathi solufikile ehofisini yabo njalo nxa abantu bexabene udlame kaluncedi, kungaba ngcono abantu baye emapholiseni loba kubaphathi bezigaba.
“Uzulu nxa esuke waba lokungazwisisani katshele amapholisa ukuze aphathiseke loba abaphathi bezigaba. Thina njengamapholisa sifisa ukuba abetheswacala laba sikhulumisane labo sizwe ukuba kwahamba njani njalo nxa kulabantu abalolwazi lokuthi bangaphi bazise amapholisa aseduzane loba ngokusitshayela ucingo,” kuphetha uInsp Ndebele.
Online Reporter