UMUNTU ulesikhathi sakhe sokuzalwa kube lesikhathi sokuthi uyadlula emhlabeni efuna loba engafuni, lasemisebenzini kunjalo kusinwa kudedelwana, isikhathi singafika kusala abasakhulayo baqhubekisele phambili umsebenzi.
Bakhona abantu abangafuni ukuthatha umhlala phansi ukuthi ayephumula azikholisele imali yakhe lemuli. Abanye baze bacine sebetshintsha lencwadi zabo zokuzalwa ukuthi babonakale njengabantu abatsha kodwa iqolo lomuntu osekhulile liyazikhanyela nxa elususa, elubeka unyawo uhle umane uzibonele ukuthi kade adliwa amaKhasimusi.
Inengi lezisebenzi lezinsuku azithandi ukuthatha umhlala phansi anganzi ukuthi kungabe kubangelwa yini abanye uzwa bethi izinto azihlangani kungcono ngibe lokhe ngincengisa ngisemsebenzini kodwa empeleni uyabe uzibulala umzimba wakho, nxa isikhathi sesifikile lahla amajogwe phansi uthwale imitshaqana yakho ubhekise amabombo kini, uyechitha isikhathi labazukulu.
Abanye ngiyangizwe bethi ungathatha umhlalaphansi awuphili minyaka emingaki. Lokhu akusiqiniso, ngamanga aluhlaza tshoko okwenyongo yenkunzi yenyathi esuthi uqethu lwekhunjini lomfula. Izisebenzi ezinengi ziyakhohlwa ukulungiselela impilo zikhohlwe ukuthi ziyaguga uthole umuntu wakhona nxa esethethe umhlalaphansi aqale phansi engela muzi, ngitsho lasibi sekhuba lokulima.
Edolobheni uyabe engelayo indlu, yibo mhlawumbe abantu abaphanga bafe ngoba ingqondo zabo azibi lokuphumula njalo lemali yakhe ucina engasayikholisi eseyisebenzisa ukwenza izinto okumele ukuthi aluba wazenza kudala esaqinile acine ehlaselwa ngumkhuhlane we-BP.
Ayixabene.
